“Boere doen goeie werk om voedsel te produseer wat benodig word deur Suid-Afrika en die wêreld; derhalwe kan ons dit nie bekostig om elke boer níé te beskerm nie, want om ’n boer te verloor is duur, ook vir ons voedselmandjies.” Dit is die woorde van mnr. David Mabuza, premier van Mpumalanga, tydens ’n vergadering met die Demokratiese Alliansie (DA) in die provinsie.
Luidens ’n verklaring sê die party dit is die eerste keer wat die staat boere se bydraes in dié provinsie erken en hulle veiligheid ernstig opneem. Die party het tydens die vergadering weer eens ’n versoek vir die vestiging van landelike veiligheidseenhede aan die provinsie deurgegee.
Eenheid om in te gryp met grond
’n Versoek vir ’n grond-ingrypingseenheid is ook aan die premier voorgelê. Dié eenheid moet daargestel word om teen onwettige grondbesetters op te tree. Die voorstel vir so ’n eenheid volg ná onlangse uitsprake van mnr. Ronald Lamola, ondervoorsitter van die ANC Jeugliga, dat ’n oorlog kan plaasvind om boere van hulle plase te verdryf.
Mabuza het aangedui dat hy dié voorstelle sal oorweeg, en die DA verwelkom dié gunstige noot waarin die vergadering plaasgevind het. Die party sê die welslae van die besprekings sal egter lê in die implementering van die voorstelle.
Kritiek oor plaasmoorde
Intussen het AfriForum en die Vryheidsfront Plus pres. Jacob Zuma gekritiseer oor die opmerkings wat hy oor plaasmoorde in die media gemaak het. Zuma het aan Beeld gesê plaasaanvalle is nie rasgedrewe nie en dat reeds in die parlement aangedui is dat dié misdaad vir die staat net so ’n groot prioriteit is as enige ander misdaad.
Volgens mnr. Ernst Roets, adjunk-uitvoerende hoof van AfriForum, dra die president se opmerking nie gewig dra nie. “As pres. Zuma se argument oor plaasmoorde konsekwent toegepas word, moet renosterstropery bloot as nog ’n vorm van stropery behandel word en geweld teen vroue en kinders nie as ’n prioriteit uitgesonder word nie.”
Mnr. Pieter Groenewald, die VF Plus se woordvoerder oor die Polisie, het sý versoek dat statistiek oor plaasmoorde deur die SAPD aangeteken moet word, herhaal. Verder sê hy navorsing het in 2003 bewys dat sowat 2% van plaasmoorde rasgedrewe is.
Bron: Beeld
