Die landboubedryf moet vergeet van kla wanneer dit by ’n gebrek aan vaardige werknemers kom en eerder die uitdagings direk aanpak om Suid-Afrika se landbousektor te versterk deur middel van hoë-gehalte opleiding.
Dit was die boodskap van die voormalige besturende direkteur van Villa, dr. Andre Schreuder, een van die sprekers tydens Villa se bekendstelling van sy samewerkingsooreenkoms met die privaat-universiteit Monash Suid-Afrika, by Villa se hoofkantoor in Kempton Park die week.
Hervorming van hoër onderwys in landbou
Die nuwe vennootskap is ’n poging om hoër onderwys in die landbou te hervorm.
“Daar is ’n behoefte om die benadering van opleiding in landbou te verander,” het dr. Schreuder gesê. “Die benadering moet een wees wat eerstens die behoeftes van produsente in ag neem, waarna ’n opleidingsmodel daarvolgens ontwikkel word. Ons moet dus vra: Wat het die boer nodig?”
Klein begin
Dr. Schreuder het gesê aangesien regeringsteun in Afrika dikwels moeilik is om te verseker, is die mees doeltreffende oplossing om die privaatsektor te betrek en sodoende die nodige vaardighede, ervaring en befondsing te verskaf om vaardigheidstekorte op nasionale- en streeksvlak uit te wis.
“Villa en Monash Suid-Afrika se vennootskap is dus in antwoord om die nodige opleiding van vaardigheidsbehoeftes van alle rolspelers in landbou te verskaf.” Monash Suid-Afrika en Villa sal van volgende jaar begin om ’n reeks kort sertifikaatkursusse in gewasproduksie aan te bied, waarna die kurrikula uitgebrei sal word om ook langer diploma-kursusse in te sluit.
