Profert het ’n internasionale vierparty-ooreenkoms gesluit vir R7 miljard se beleggings vir die oprigting van verskeie aanlegte in Suid-Afrika, het dié kunsmismaatskappy in ’n verklaring aangekondig.
Die ander drie partye is die China Africa Development Fund (CAD Fund), die Chinese kunsmismaatskappy RuiXing, wat vroeër die meerderheidsbelang in Profert bekom het, en Suid-Afrika se Nywerheidsontwikkelingkorporasie (NOK).
Die ooreenkoms is ten tyde van ’n onlangse besoek van pres. Jacob Zuma aan China onderteken, wat daarop gemik was om handelsbande tussen China en Suid-Afrika te versterk, lui die verklaring.
Benewens kunsmis, het Profert sy werksaamhede en belange die laaste jare ook na ander produkte en bedrywe uitgebrei.
RuiXing, China se grootste kunsmisverskaffer in private hande, het verlede jaar die meerderheidsbelang in Profert bekom. Ten tyde van dié aankondiging het Profert ’n gesamentlike jaarlikse omset van meer as R16 miljard en ’n gesamentlike batebelang van meer as R10 miljard saam met RuiXing in die vooruitsig gestel.
Die twee nuwe vennote het toe beplan om ‘n nuwe aanleg vir die omskakeling van steenkool na ureum, springstof en verwante produkte te vestig.
Die RuiXing-groep is ook spesialiste in die vervaardiging van stysel en glukose, en die vestiging van sulke aanlegte as deel van die Suid-Afrikaanse landbou-waardeketting is ook in die vooruitsig gestel.
