Navorsing toon die venstertydperk vir die oordrag van bek-en-klouseer kan korter wees as wat aanvanklik verwag is, wat protokol rondom die bestryding van die siekte kan verlig. Luidens ’n berig op die webwerf ScienceDaily is die venstertydperk amper die helfte korter as wat aanvanklik vasgestel is.
“Die bevinding stel voor dat omstrede bestrydingsmaatreëls om die verspreiding van die virus te keer, soos om ’n groot aantal diere dood te maak, verlig kan word,” lui die berig.
“Die studie wys dat dít wat ons oor bek-en-klouseer geweet het nie heeltemal waar is nie,” sê prof. Mark Woolhouse van die Universiteit van Edinburg, mede-skrywer van die studie. “Wat ons dus dink ons weet van menslike griep en ander oordraagbare patogene kan dalk ook nie heeltemal akkuraat wees nie.”
Die eksperiment
Die navorsers het eksperimente op koeie gedoen om te bepaal hoe lank vanaf infeksie die venstertydperk van infektering van ander diere is. In sommige gevalle was dit so kort soos 1,7 dae voordat die dier se immuunstelsel begin werk en die duplisering van die virus onderdruk het.
Dr. Bryan Charleston, nog ’n navorser, en Woolhouse het ook in 28 gevalle gesonde koeie met die virus geïnfekteer. Volgens hul bevindings is die virus slegs in agt gevalle suksesvol na ’n ander dier oogedra.
Volgens die resultate van die studies stel Charleston en sy kollegas voor dat beeste met bek-en-klouseer slegs vir ’n kort tydperk, ongeveer 0,5 dae, aansteeklik is voordat die kliniese tekens van die siekte voorkom.
Die navorsers is tans op soek na vinniger maniere om die siekte en kliniese tekens by diere te diagnoseer, want hulle reken as ’n boer die siekte binne 24 uur van infeksie by ’n dier kan raaksien, die dier van die trop verwyder kan word sonder dat die virus na die res van die trop versprei het.
SA se probleem kom uit die KNP
Intussen berig Beeld (10 Mei) die uitbreking van bek-en-klouseer vroeër in KwaZulu-Natal kom uit die Krugerwildtuin en die staat het nagelaat om die verspreiding daarvan te voorkom.
Luidens die berig bewys uitslae van kliniese toetse wat Maandagoggend aan die Departement van Landbou, Bosbou en Visserye oorhandig is, het die virus wat gediagnoseer is ’n genetiese verwantskap met virusstamme wat voorheen in die wildtuin geïsoleer is.
“Suid-Afrika het dus homself besmet, met buffels wat van die wildtuin in die oorgrensgebied in Mosambiek inbeweeg het, met die wildtuin-buffels wat beeste en ander buffels aangesteek het, want die genetiese verwantskap bewys dit,” sê ’n kenner.
’n Antwoord word binnekort van Minister Tina Joemat-Pettersson van die Departement van Landbou, Bosbou en Visserye en die departement verwag.
Bronne: ScienceDaily en Beeld.
10 Mei 2011
