Die skou is vanjaar die 25ste keer aangebied. Meer as 60 000 besoekers van 142 lande het die skou verlede maand bygewoon.
Me. Wendy Peterson, wat aan die begin van die jaar as bedryfsbestuurder van dié eenheid aangestel is, sê dit is belangrik vir klein besighede om aan sulke geleenthede deel te neem, omdat dit handelsmerke se prestige en bekendheid verbeter en hulle help met hul posisionering in die internasionale mark. “Die ondersteuning wat ons aan die handelsmerke bied, sal hulle in staat stel om wêreldwyd met kopers en invoerders handel te dryf en hul teenwoordigheid in die internasionale mark te laat groei.”
Me. Antoinette Vermooten, uitvoerende hoof van Bayede!, wat vanjaar se ProWein bygewoon het, sê dit was ’n wonderlike geleentheid waar die handel en produsente mekaar kon ontmoet. “Dit is ’n ideale platform om ons handelsmerk in pas te bring met internasionale en ander Suid-Afrikaanse handelsmerke. Ons hoef nie terug te staan nie en kan op gelyke voet met gehalteprodukte en die pryse van ons wyne op hierdie vlak meeding.”
Me. Beverly Farmer van Women in Wine sê nadat dié handelsmerk twee jaar nie ProWein bygewoon het nie, was dit opwindend om vanjaar se handelskou by te woon en hul wynmaker, Lisha Nelson, aan besoekers voor te stel. Sy sê dié handelsmerk het waardevolle langtermynvennootskappe gesmee wat vir nuwe geleenthede in onder meer Italië en Kenia gesorg het. “ProWein het vanjaar my verwagtinge heeltemal oortref ten opsigte van die hoeveelheid mense wat ek ontmoet het. Dit was ongelooflik om ander vroue in die globale wynbedryf te ontmoet wat dieselfde passie vir wyn as ons het.”
Ontvang die nuutste landbounuus en -raad in verskeie bedrywe - teken HIER in vir een van ons nuusbriewe.
