Die varsproduktebedryf gaan die onstabiele politieke klimaat en die swak ekonomiese toestande aan sy bas voel in die komende paar jaar.
By die pas afgelope PMA Fresh Connections-konferensie in Kaapstad het hierdie sentiment veral sterk na vore gekom uit ’n ontleding van die situasie waarin kettingwinkels hulself bevind.
Volgens me. Marylda Masojada, besturende direkteur van Trade Intelligence, lê ’n tydperk van strawwe kompetisie – veral in prys – vir kleinhandelaars voor omdat daar nie ’n noemenswaardige groei in die grootte van hul omset voorspel word nie. Hierdie situasie sal meebring dat winsmarges van hierdie maatskappye sal krimp en dat die prysoorlog na produsente sal oorspoel.
By die konferensie is egter gefokus op die geleenthede vir Suid-Afrikaanse produsente in die buiteland, veral in die res van Afrika.
Eerste vir Fruit & Veg
Ná sewe jaar waar ’n primêre produsent as voorsitter van die PMA gedien het, (eers mnr. Louis de Kock van Wildeklawer en toe mnr. Tommie van Zyl van ZZ2), het mnr. Brian Coppin, stigter en besturende direkteur van Fruit & Veg City die voorsitterskap oorgeneem.
“Suid-Afrika is geseënd met boere wat in staat is om ’n oorvloed van hoëgehalte produkte in soms baie moeilike omstandighede te produseer. Uiteindelik, soos wat ons almal om markaandeel werk, het kleinhandelaars die voordeel van hierdie oorvloed. Die PMA het die noodsaaklikheid daarvan om in die res van Afrika uit te brei, herken. Een van die wyses waarop ons beoog om die waarde wat PMA bied, te vergroot, is om meer netwerk-geleenthede te skep en ook meer maniere te soek waarop ons lede met die markplek kan skakel.
“Die uitbreiding en aanmoediging van die vraag na ons lede se produkte is ’n sleutelpilaar van die waarde-belofte van die PMA. Ek wil graag in hierdie aspekte ’n strategiese rol speel en die ontwikkeling daarvan gedurende my tyd as voorsitter verder dryf,” het Coppin gesê.
