Die Future Farmers-stigting, wat oor die afgelope dekade reeds meer as 500 jong landbou-studente gehelp het om internskappe op plase in Suid-Afrika en die buiteland te kry, het ’n welkome inspuiting van R12 miljoen van AgriSETA (die landbou se sektorale onderwys- en opleidingsowerheid) ontvang.
Volgens me. Judy Stuart, die stigter van die stigting, is dit meer geld as wat die stigting altesaam oor die afgelope dekade gesien het. “Die Future Farmers-model is geskoei op ’n internskap van twee jaar in Suid-Afrika en dan ’n jaar oorsee en ons werk meestal met matrikulante. Die studente ontvang die minimumloon tydens hul internskappe en ’n kompeterende salaris as hulle oorsee is. Die befondsing het tot nou van boere, boeregemeenskappe, kleiner borgskappe en die studente self gekom.
“Die AgriSETA-skenking vereis dat ons 100 studente vir ’n jaar ’n internskap bied en hulle uit die skenking ’n salaris betaal. Die boer waar hulle in diens is, sal ’n minimale bedrag, wat van belasting verhaalbaar is, moet betaal. Hierdie proses moet dan vir ’n tweede jaar herhaal word.
“Alhoewel hierdie voorskrifte nie ooreenstem met ons model nie, is ons ongelooflik dankbaar daarvoor en dit gee hierdie 200 studente ’n voet in die deur - ’n geleentheid op ’n plaas - en dit is al waarvoor hulle vra. Die Future Farmers-stigting het dus 12 maande tyd om vir die eerste 100 studente finansiering te bekom om hulle tweede jaar van internskap te voltooi en hulle dan oorsee te stuur. Dit is ’n uitdaging, maar ek is seker ons sal dit regkry,” verduidelik sy.
Me. Sandy la Marque, die uitvoerende hoof van Kwanalu, het vir Stuart gehelp met die aansoek om befondsing van AgriSETA te bekom. “Hierdie befondsing stel Future Farmers in staat om meer mentors vir die jong studente aan te stel en dus die doeltreffendheid en omvang van hul program aansienlik uit te brei. Ons is verheug om te kon help om ’n program wat die toekoms van die landbou op so ’n positiewe manier help vorm,” sê La Marque.
