Die uitwerking daarvan op die Suid-Afrikaanse
ekonomie kan erger wees as die huidige beurtkragkrisis.
Daar is steeds geen oplossing tussen Transnet en die United National Transport Union (Untu) nie, maar intussen word wyd gewaarsku oor die vernietigende uitwerking daarvan op die ekonomie.
Erger as Eskom-krisis
“Die uitwerking van die staking is baie erger as dit met die huidige energiekrisis vergelyk word,” waarsku dr. Juanita Maree, uitvoerende hoof van die Suid-Afrikaanse vereniging van vragversenders (SAAFF).
“Soos ons gedurende die pandemietydperk geleer het, bly dit van deurslaggewende belang om ons verskaffingskettings te alle tye aan die gang te hou. Ons navorsing toon die logistieke vertragings wat die verskaffingsketting nou ervaar, kos Suid-Afrika reeds R100 miljoen tot R8 miljard per dag.”
Maree sê volgens die Suid-Afrikaanse Inkomstediens (SAID) het Suid-Afrika R343 miljard se handelsware in Augustus verhandel (in- en uitvoer).
“As in ag geneem word dat 70% van die goedere afhanklik is van seevervoer, blokkeer die staking per dag goedere ter waarde van R8 miljard. Reken jy die uitkringeffek daarvan by, word die impak van die staking te veel vir Suid-Afrika om te absorbeer gegewe die huidige ekonomiese klimaat,”
Sy sê een dag se verlies aan hawe-aktiwiteit veroorsaak dat daar op bedryfsvlak tien dae nodig is om van net die een dag te herstel.
“Ons skatting oor die ekonomiese impak is konserwatief, dit kan selfs baie meer wees. Die staking wurg die ekonomie tot by breekpunt en daarom is dringende optrede nou nodig. Internasionale handel bly een van Suid-Afrika se kernaandrywers vir ekonomiese groei en ontwikkeling.”
Maree sê dit is duidelik dat die besluitnemers oor die staking nie die volle prentjie het oor die uitwerking wat die staking op die ekonomie kan hê nie. “Die onbedoelde gevolge van stakings by die hawens gaan baie erger wees as die impak van die huidige energiekrisis as dit nie gou bygelê word nie. Ons kan nie net op ’n tussentydse plan voortgaan nie.”
Intussen verskil Transnet en Untu steeds oor die meriete vir die staking. Transnet glo dit is ’n onwettige staking, maar Untu verskil daarmee. Lede van ander vakbonde gaan hul boonop moontlik vandag by die stakende werkers aansluit.
Infrastruktuur net-net onderhou
Die staking het weer probleme met die infrastruktuur by Suid-Afrika se hawens en die impak daarvan op uitvoerbedrywighede van onder meer vrugte en wyn uitgelig.
Absa het verlede week in ’n verslag oor Suid-Afrika se infrastruktuur en hoe die regering geld daaraan bestee, bevind die stand van infrastruktuur vir onder meer kragvoorsiening, hawens, die spoorwegnetwerk, en water en sanitasie moet dringend aangepak word.
Die bruto plaaslike vaste belegging in Suid-Afrika het van 2008 af drasties begin daal. In die derde kwartaal van 2022 was dié belegging maar 14% van die bruto binnelandse produk teenoor die hoogtepunt van 22,7% in die laaste drie maande van 2008. Dié daling wys geld wat wel bestee word, is grootliks vir onderhoudswerk pleks daarvan om kapasiteit uit te brei en te groei.
Absa glo die daling in besteding kan gedeeltelik toegeskryf word aan die private sektor wat nie meer so baie geld bestee soos voorheen nie.Bykomende bron: Bloomberg/News24
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
