Die raaisel oor die video van die lang rye vragmotors met vragte mielies wat by die NWK-silo’s by Kameel in Noordwes afgelaai word, is opgelos.
(Die video hieronder vertoon die rye vragmotors, maar bepiegelinge en vrae oor die aantal vragmotors en die massa graan wat op Kameel afgelaai is, is bevraagteken.)
Met die hulp van mnr. Jerry Maritz, hoofbestuurder: Graan van NWK, het Landbou.com mnr. Nic Schulenburg van Engelhart Commodities Trading Partners (ECTP) opgespoor.
Meksikaanse mielies
“Ja,” sê Schulenburg: ECTP, die onderneming waarvoor hy werk, voer dié mielies in. “Dit is Meksikaanse mielies, en is onder meer na Zimbabwe onderweg.” Hy het benadruk dat dié mielies glad nie vir Suid-Afrika bestem is nie.
Hy sê die aanvanklike bespiegeling dat 200 lorries sowat 70 000 ton mielies na Kameel vervoer, is nie korrek nie. “Ons voer sowat 60 000 ton mielies in, hoofsaaklik via die Durbanse hawe. Die mielies moet vinnig in die hawe ontskeep word omdat dit baie duur is as 'n vragksip in die hawe lê. Dus word 200 vragmotors van so 34 ton elk gelaai en hulle kry koers Kameel toe.”
Op een besending word sowat 7 000 ton mielies na Kameel vervoer. Die hele besending sal uiteindelik meer as 1700 vragte beslaan!
NWK-personeel werk 24 uur
Sodra die eerste vragmotors by die silo’s op Kameel aankom, werk die personeel 24 uur per dag om alles so gou as moontlik te ontskeep, sê Schulenburg. Hy is vol waardering vir dié hardwerkende NWK-werknemers wat onverpoosd werk om die mielies af te laai.
Die vragte word hoofsaaklik deur Bextrans, 'n deel van Bester Graan, gehanteer, sê Schulenburg. Hy vertel dat ná aflaai op Kameel, die vragmotors mangaan- of chroomerts oplaai wat na die kus vervoer word.
Volgens ECTP se webwerf is dié onderneming se werk die verkryging, vervoer én verhandeling van sowat 15 miljoen ton landbou-kommoditeite per jaar, reg oor die wêreld! Selfs op Kameel!
* Die persoon wat die video geneem het, se naam is ongelukkig nog nie bekend nie, maar wat gewis is: Kameel sal seker nooit weer dieselfde wees nie!
https://youtu.be/H2R4o76doN0
