‘n Buffelbul van die Thaba Tholo-wildreservaat is onlangs op ‘n veiling teen ‘n rekordprys van R9,2 miljoen aan mnre. Piet du Toit en Cyril Ramaphosa verkoop, sê Vleissentraal Bosveld.
Luidens ‘n verklaring was dit die grootste wildveiling nóg in Suid-Afrika met ‘n omset van R65 083 250. Mnr. Willie Roux, afslaer, sê dit is ook die hoogste prys wat nog in die land vir ‘n buffelbul betaal is.
Die bul, Bayeto, het ‘n horingspan van 47cm en is amper agt jaar oud. Volgens Roux sal die bul vir nog ‘n paar maande op Thaba Tholo vertoef terwyl Ramaphosa die wildkampe op sy wildplaas in orde kry. Ramaphosa het glo onlangs ‘n wildplaas naby Warmbad gekoop.
Dié dier behoort vir twee jaar op Ramaphosa se plaas aangehou te word, waarna dit weer op Du Toit se wildplaas ‘n tuiste sal vind. Die bul is op Thaba Tholo geteel en gaan in verdere teelprogramme gebruik word.
Kopers van Namibië en Botswana
Sowat 600 mense het die veiling bygewoon met kopers van Suid-Afrika, Namibië en Botswana wat met 11 helikopters en 13 vliegtuie opgedaag het. Vyf ander rekordpryse is ook tydens die veiling aangeteken.
‘n Buffelvers het ‘n yslike prys van R1,5 miljoen bereik, met die vorige rekord op R320 000. ‘n Buffelkoei is teen R1,25 miljoen verkoop, terwyl die vorige rekord vir ‘n buffelkoei R920 000 was.
‘n Elandbul het R34 000 behaal, met die vorige rekord by R19 000. ‘n Elandkoei en haar kalf is vir R13 000 verkoop. Die vorige rekordprys was R11 000. Steenbokke het ook ‘n rekord van R6 000 teenoor R3 000 bereik.
‘n Buffelkalf wat hans grootgemaak is, is teen R180 000 verkoop ten bate van die Stop Rhino Poaching-organisasie.
1 Oktober 2010
