RCL Foods het ’n belang van 49% in LiveKindly Africa wat Fry’s – die grootste plantgebaseerde voedselhandelsmerk in Suid-Afrika – versprei en bemark.
Die departement van landbou, grondhervorming en landelike ontwikkeling wil hê veganistiese produkte met name wat gewoonlik met vleis vereenselwig word, soos “vegetariese wors” of “plantgebaseerde burgers” moet van die winkelrakke verwyder word. Die Verbruikersraad van Suid-Afrika het egter ’n hofinterdik daarteen bekom.
Field sê daar is geen bewyse dat die benamings van die plantgebaseerde produkte verbruikers verwar nie en die regering het geen grondslag om bloot die produkte te verwyder nie.
Hy het tydens ’n onderhoud met Landbou.com oor RCL Foods se jongste jaarresultate gesê die plantgebaseerde produkte vorm ’n baie klein deel van die groep se sake en hy sien nie enige noemenswaardige risiko vir die maatskappy weens die huidige herrie nie. “Natuurlik is dit kommerwekkend dat iets wat reeds 30 jaar bestaan het nou skielik begin teenkanting kry. Dit (die voorgenome verwydering van die produkte) wek agterdog oor waar dié aksie nou skielike vandaan kom en dit toon hoe pateties kwessies in hierdie land geopper word.”
Hy sê pleks daarvan om summier die produkte te verwyder, moet die regering gehoor gee aan die versoek van die plantgebaseerde bedryf wat die regering al geruime tyd vra vir ’n stel regulasies wat gevolg kan word oor die benaming van die produkte. “Dit moet ’n proses van konsultasie wees om te verseker dat behoorlike regulasies, soortgelyk aan dié wat die vleisbedryf reguleer, ingestel word.”
Groeimomentum word behou
Veerkragtigheid en ’n slim sakestrategie het RCL Foods gehelp om in die boekjaar tot einde Junie 2022 sy groeimomentum te behou. Die maatskappy doen sake in die kruideniersware-, suiker-, hoender- en logistieke bedryf.
Die groep se inkomste het met 10,2% tot R34,9 miljard verstewig, terwyl ebitda (verdienste voor rente, belasting, waardevermindering en afskrywing) met 7,7% tot R2,59 miljard gegroei het.
Hy het die omdraaistrategie in die groep se hoenderbedrywighede uitgesonder as een van die faktore wat tot die bedryfswins van R89 miljoen vir dié afdeling bygedra het, teenoor die verlies van R209 miljoen ’n jaar gelede.
Field waarsku egter dat die regering se besluit om invoertariewe op gestorte hoendervleis met ’n jaar uit te stel, groot onsekerheid in die bedryf skep. “Dit druis heeltemal in teen alles wat onderhandel is. Hoewel dit gedoen is om sukkelende verbruikers van goedkoop hoendervleis te voorsien, is daar geen bewyse dat die verbruiker goedkoper vir hoendervleis sal betaal danksy hierdie stap nie.”
Sedert November 2020 het die groep sy strategie verander om meer op sy waardetoegevoegde produkte te konsentreer en van sy bedrywighede te desentraliseer om koste te besnoei. Daar is besluit om drie van sy afdelings, Vector Logistics, Rainbow Chicken (wat intussen net as “Rainbow” herbenoem is) en sy suikerbedrywighede te ontwikkel tot entiteite wat op hul eie bene kan staan.
Intussen is besluit dat die suiker-afdeling vir eers deel van die groep gaan bly nadat hy sy tweede hoogste wins nog behaal het. Field sê die afgelope jaar het die somerreën baie laat gekom en daarom was die toestande nie perfek nie. “Maar ons damme is vol en die gehalte van die suikerriet is baie beter as in die vorige boekjaar. Ons is optimisties oor die vooruitsigte.”
RCL Foods, wat handelsname sooos Nola-mayonnaise, Ouma-beskuit, Selati, Simply Chicken en Yum-Yum-grondboonbotter besit, het probeer om die prysverhogings te beperk om die vuisvoos verbruiker te beskerm, sê Field.
Onderliggende margedruk weens die hoë pryse van grane, veral koring, was gedurende die afgelope boekjaar ’n probleem en dit gaan vorentoe steeds RCL se wins onder druk plaas, sê Field. “Insetkoste is die grootste risiko wat ons in die gesig staar en ons probeer so ver as moontlik voedselinflasie beheer. Die enigste ding wat ons kan doen, is om te innoveer met ons aanbiedings sodat verbruikers steeds hul gunstelinghandelsname kan bekostig.”
