Hugo Lochner, redakteur van Landbouweekblad en een van die mees gesoute en gerespekteerde landboujoernaliste in Suid-Afrika, het die tuig ná 30 jaar diens neergelê.
Hy het op 1 Januarie 1984 by die tydskrif begin werk nadat hy die graad B.Agric.Admin. aan die Universiteit Stellenbosch verwerf en twee jaar diensplig in die Nasionale Weermag gedoen het, onder meer by die Geniekorps op Kroonstad. Lochner het gedurende sy loopbaan as landboujoernalis die gesogte John Deere-prys vir landboujoernalistiek gewen.
Hy het ook op verskeie geleenthede die eerbewys van Fotograaf van die Jaar van Landbouskrywers SA ontvang en het talle kere die Foto van die Jaar ingeskryf.
Hy het ook verskeie ander joernalistieke eerbewyse ontvang. Hy was etlike jare lank nasionale voorsitter van Landbouskrywers SA en het as lid van die vereniging op verskeie geleenthede as beoordelaar van die Internasionale Federasie van Landboujoernaliste se internasionale fotowedstryd opgetree.
Hugo se bydrae tot die tydskrif sal gemis word, en hy word sterkte toegewens op sy pad vorentoe, het Chris Burgess, hoof van landboutitels by Media24, gesê.
