Die somer se reënvalprentjie is tot dusver ’n gemengde een, met talle wat dankbaar is dat hulle ’n groener Kerstyd as verlede jaar binnegaan. In uitgestreke dele van die land neem die voorsiening van weiding en water aan vee egter toenemende kritiese afmetings aan.
Neerslae sedert die begin van Oktober was tot ’n groot mate tot die ooste beperk. In die omgewing van Bethlehem en Vrede in die Oos-Vrystaat is daar op 5 Desember welkome neerslae van tussen 41 mm en 51 mm aangeteken, sê me. Alani Janeke, woordvoerder van Vrystaat Landbou.
Sy voeg by dat uiterste weerstoestande in dié provinsie heers. Sonneblom staan byvoorbeeld reeds in die blom tussen Winburg en Senekal, en plate water staan tussen Bethlehem en Warden, maar in die suid-Vrystaat, by dorpe soos Bethulie en Fauresmith, wag gemeenskappe steeds angstig op die eerste betekenisvolle reën van die seisoen.
Oor die grootste deel van die somersaaigebied was reën tot dusver voldoende om te kon plant, berig mnr. Johan van den Berg, klimatoloog van Santam Landbou. Dit sluit wel nie Noordwes in nie.
Op plekke in die westelike dele van die gebied waar wel geplant is, het die jong gesaaides teen 6 Desember swaar getrek in warm en winderige toestande en sonder opvolgneerslae. Intussen het die swak La Niña wat middel November wêreldwyd afgekondig is, die wyk geneem.
Seetemperature en ander toestande in die tropiese Stille Oseaan wat op die stand van dié klimaatverskynsel en haar broer El Niño dui, het sedertdien tot die neutrale fase teruggekeer.
Klimaatmodelle toon dat die kanse skraal is dat La Niña wel in die komende maande sal herontwikkel. Terwyl La Niña dikwels met bogemiddelde reënval in ons somerreënvalstreke gepaard gaan, en El Niño met ondergemiddelde neerslae, is ’n neutrale toestand meestal ’n aanduiding dat normale reën verwag kan word.
