In dele van Noordwes is tot 40 mm gemeet, terwyl ander dele geen reën ontvang het nie. “Ons harte bloei vir die boere wat nog nie noemenswaardige reën ontvang het nie,” sê mnr. Naudé Pienaar, assistent-hoofbestuurder van Agri Noordwes.
In die distrik Hertzogville in die Wes-Vrystaat wag boere naarstig op reën om te kan plant, terwyl erge veldbrande die distrik die naweek geteister het. “Ons hou nog, maar net-net,” sê mnr. Gys Olivier, ’n boer van die omgewing.
Ook in die Suid-Vrystaat wag boere nog op goeie reën, veral boere wat weke gelede deur ’n erge veldbrand in distrik Trompsburg geraak is.
Die Suid-Afrikaanse Weerdiens het die afgelope naweek slegs geringe neerslae in die Noord-Kaap aangeteken.
‘Geloofsmielies’
Mnr. Pierre van Eeden, wat op die plaas Heuninglaagte in die distrik Edenville boer, is ongelooflik dankbaar dat hy die naweek 40-50 mm reën ontvang het. Hy het verlede week sy eerste landery mielies begin aanplant na hy reën gekry het. Hy moes egter ophou plant nadat hy gesien het die saad sukkel in die droë grond.
“Ek is baie dankbaar om vanoggend te kan sê daardie ‘geloofsmielies’ het begin groei ná die naweek se neerslae.”
Hy kan vandeesweek verder plant.
Intussen sê me. Vanetia Phakula, weervoorspeller van die Suid-Afrikaanse Weerdiens, dat hulle nie vandeesweek noemenswaardige reën vir die land verwag nie. “Tans sien ons ’n 30% kans op reën in dele van Mpumalanga, KwaZulu-Natal, die Oos-Vrystaat, Gauteng en die oostelike dele van Noordwes vanaf Vrydag tot Sondag.”
Mnr. Johan van den Berg, klimatoloog van Santam Landbou, het onlangs gesê dat weermodelle aandui dat daar in die laaste twee weke van Desember ’n kans op reën in die somerreënstreek bestaan.
Ontvang die nuutste landbounuus en -raad in verskeie bedrywe - teken HIER in vir een van ons nuusbriewe.
