Die swaar reënneerslae wat die afgelope weke oor Gauteng voorgekom het, het aansienlik versuipskade aan gewasse veroorsaak.
Mnr. Andre Botha, voorsitter vir Agri Gauteng, sê volgens ‘n opname wat hy gedoen het, het boere in die provinsie tussen 12% en 18% skade aan hulle oeste, terwyl graadskade aan gewasse tussen 30% en 40% is.
Botha sê hy is wel bekommerd oor die feit dat kommoditeitspryse tans styg, terwyl boere nie seker is hoe hulle oeste gaan lyk nie.
“Dit beteken boere kan hulself in kontrakte vir graad en hoeveelheid inteken, terwyl die opbrengste dalk nie is wat aanvanklik verwag is nie.”
Nigel hard getref
Volgens Botha het veral boere in die Nigel-distrik erge versuipskade, veral onder hulle mielie-aanplantings.
Mnr. Manny da Costa, ‘n boer van die Manjoh-boerdery naby Nigel, sê: “Ons ouer mielies lyk nog redelik goed, maar die jonger mielies is hard getref en die meeste is daarmee heen. Die sojabone trek ook baie swaar.”
Die Vereeniging-, Pretoria- en Bronkhorstspruit-distrikte het ook swaar onder reën deurgeloop. “Eintlik is daar nie ‘n distrik wat gespaar is nie, hoewel die skade in sekere distrikte net plek-plek voorkom,” vertel Botha.
Hy sê hulle is wel bewus van een voorval van Slenkdalkoors wat tans by Bronkhorstspruit ondersoek word.
“In dié stadium is dit beperk tot ‘n sekere gebied, maar weens die baie reën is die meeste boere op die uitbreek van dié en ander siektes bedag.”
27 Januarie 2011
