Terwyl inwoners in dele van die Limpopo besig is om op te ruim nadat oorstromings grootskaalse skade en ontwrigting veroorsaak het, het die reën wat die afgelope paar dae in die Soutpansberg geval het, groot verligting gebring.
Mnr. Willie Roux, ’n afslaer van dié kontrei, sê die goeie reëns het gister ’n groot invloed gehad op die uitstekende pryse wat vee op die Blouberg-aanteelveiling op Vivo behaal het.
Koeie met kalwers is vir tot R18 250 verkoop terwyl dragtige verse en dragtige koeie onderskeidelik R16 000 en R12 500 stuk behaal het. Oop verse is vir tot R9 300 stuk van die hand gesit terwyl speenkalwers tot R6 500 stuk behaal het.
Slagosse is vir tot R7 600 stuk verkoop.
Die omset van die veiling was net meer as R5,2 miljoen vir altesame 473 diere en 190 kalwers wat verkoop is.
Die veiling is vanjaar vir die agttiende keer aangebied en word as een van die merkwaardigste aanteelveilings in die land beskou.
20 Januarie 2012
