Die meeste dele van die somersaaigebied waar boere liefs teen 15 November moet plant, het genoeg reën gekry om dit wel te kan doen, sê mnr. Johan van den Berg, klimatoloog van Santam Landbou.
Sedert middel Oktober het die grootste deel van die sentrale tot oostelike somergraangebied rondom 20 mm tot 100 mm reën of meer gehad, sê hy.
Hy wys daarop dat die Indiese Oseaan Dipool-indeks, ’n klimaatsaanduider, in sterk negatiewe gebied is, met relatief koeler water nader aan Afrika en baie warmer water na Suidoos-Asië se kant. “Dit is in die algemeen ’n baie positiewe teken vir reënval oor suidelike Afrika, veral in kombinasie met ’n La Niña of selfs neutrale toestande in die Niño-gebiede.”
Goeie kans op meer reën
Wat die res van die seisoen betref, sê Van den Berg, as meer karaktertrekke van ’n La Niña sou begin wys, is dit gewoonlik teken van ’n goeie kans op mid- tot laatsomerreën tot in die meer westelike dele.
Intussen het talle distrikte, ook in die verder westelike dele, sedert begin November reën gekry. Die moontlikheid van wydverspreide neerslae oor Suid-Afrika se mielieverbouingsgebied is in korttermyn-vooruitskouings tot middel November voorspel.
Risiko van rypskade
Die beste planttyd vir die oostelike mielieproduksiegebied duur gewoonlik tot 15 November. Daarná kan wel nog geplant word, hoewel dit dan met ’n groeiende risiko vir vroeë rypskade gepaard gaan.
Mnr. Wandile Sihlobo, ekonoom van die sakekamer Agbiz, het op 9 November gesê mielieboere het in die meeste gebiede begin plant, hoewel nog nie oral op groot skaal nie omdat grondvogvlakke in talle dele nog redelik laag is.
