Buiten vir wintergraanboere is boere oor die algemeen baie meer optimisties dat die huidige seisoen beter as die vorige een gaan wees.
Op 'n nuwe indeks wat boere se tevredenheidsvlakke oor hul hoofboerderybedrywighede meet, het die gemiddelde vlak van 45% tot byna 65% gestyg.
Die onderneming Marketing Surveys and Statistical Analysis (MSSA), wat bykans 20 jaar 'n jaarlikse landboustudie doen, het van Desember verlede jaar tot Februarie vanjaar sowat 500 boere se menings vir die tevredenheidsindeks getoets.
Boere is gevra hoe tevrede hulle met die 2015-16-seisoen was, en wat hulle vir die 2016-17-seisoen verwag.
Veral suiker-, druiwe-, bees-, wintergraan-, suiwel- en pluimveeboere was meestal ontevrede met hul sake in die vorige seisoen.
Bosbou-, groente- en vrugte-, en wol- en sybokboere was die drie groepe wat die hoogste tevredenheidsvlakke gehad het.
Mnr. Schalk van Vuuren, navorsingsdirekteur van MSSA, sê dit is interessant dat somergraanboere se tevredenheidsvlak, ondanks die droogte, byna 50% en dus bo die gemiddeld was.
Boere word in die opname oor spesifieke faktore ondervra en somergraanboere het aangedui die faktore wat tot hul tevredenheid bygedra het, was redelike markpryse, winsgewende boerdery/beter produksie/beter winste, en goeie bestuur.
Reën bring hoop
In die opname oor verwagtinge vir die huidige seisoen is die invloed van die droogte in die wintergraangebiede duidelik te sien – wintergraanboere se tevredenheid lê by 46,2% op die indeks, baie laer as die gemiddeld.
Ook pluimveeboere is onder die gemiddeld, hoewel die indekspunt van 58,1% vir die huidige seisoen baie hoër is as die 32,2% van die vorige seisoen.
Van Vuuren sê pluimveeboere het aangedui redelike markpryse, hoë vraag in die mark, en goeie, gemiddelde reënval het hul verwagtinge verbeter. Melkboere se gemiddelde verwagtinge is op 64,4% ook baie beter as die 31,7% van die vorige seisoen.
Ook hulle het goeie, gemiddelde reënval en redelike markpryse as belangrik uitgewys, asook dat hulle beter produksie verwag en dat hulle identifiseer met die beskrywing “optimisties/hoopvol/geniet die boerdery/verwag toekomstige groei”.
Wild- en toerismeboere is ook uiters optimisties en het gesê die goeie reënval beteken daar is genoeg weiding en hulle het voldoende of genoeg grond.
Die mees optimistiese groep, naamlik “ander”, behels volgens Van Vuuren enkele respondente in die blomme-, vark- en tabakbedrywe.
Rig navrae aan mnr. Schalk van Vuuren by tel. 012 346 0718 of e-pos mssa2@mssa-research.co.za.
