Hy glo nie juis aan teorieë oor sameswering nie, maar nou begin hy wonder of dit nie presies juis daarop neerkom nie: Die ANC wat die pas van grondhervorming met opset vertraag sodat dit later gebruik kan word om emosies te help opsweep wanneer hy by sy kieserskorps is in die moeilikheid is.
Aldus Max du Preez, gerekende joernalis en politieke analis, in ’n artikel wat in Moneyweb verskyn het. “Baie, dalk selfs die meeste van die boerderye wat aan nuwe swart boere toegesê is, het nie geslaag nie, veral weens die gebrek aan geldelike en tegniese steun. En hier’s nog ’n bewys dat die Regering onmoontlik ernstig oor grondhervorming kan wees: Pres. Jacob Zuma wat die Minister van Grondhervorming, Gugile Nkwinti, wéér in sy pos aanstel, met Senzeni Zikwana as die nuwe Minister van Landbou en die stout seun van die polisie, Bheki Cele, as sy adjunk.”
Politici wat so graag die emosies oor grond opsweep, moet ook onthou dat twee derdes van alle Suid-Afrikaners nou verstedelik is en dat weinig van hulle wil boer – hulle droom eerder oor beter huise, beroepe, motors, duurder TV’s en beter opvoeding vir hul kinders, skryf Du Preez. Diegene wat wél boer, leef in landelike gebiede en sou met minder as vyf hektaar tevrede wees, aldus vroeëre RGN-opnames.
“Suid-Afrika se oorblywende 36 000 kommersiële boere – 120 000 minder sedert 1994 – het ’n goeie internasionale reputasie vir hul vindingrykheid en veerkrag opgebou. Maar vlakke van belegging in plase en landboukundige infrastruktuur het die laaste tyd aansienklik afgeneem, veral weens die gebrek aan sekerheid oor grondeienaarskap. En soos sake nou staan, sal dit net vererger soos wat invoer van koring, rys, hoender en rooivleis elke jaar toeneem. Miskien ís alles net ’n reuse-komplot. Of dalk is die rede vir die ANC-traagheid dalk dieselfde as vir al sy ander mislukkings oor die laaste dekade: ’n gebrek aan visie, swak leierskap, 'n politieke deurmekaarspul, burokrasie vol brouwerk en natuurlik... korrupsie.”
Bron: Moneyweb.
