Dit is tyd dat die President en die ministers van Suid-Afrika besef hul verantwoordelikheid is teenoor ál die inwoners van die land − nie net die mense wat vir hulle gestem het nie, het mnr. André Botha, voorsitter van Agri Gauteng, op sy organisasie se kongres op Irene gesê.
Hy het gewys op die belangrikheid van verhoudinge en die verantwoordelikhede wat met regte gepaardgaan. Boere het ook die verantwoordelikheid om verhoudinge te bou en betrokke te wees, anders het hulle nie die reg om regte op te eis nie, het hy gesê.
Hy het lede aangemoedig om te kyk watter verskil hulle in hul eie omgewing en dan op nasionale vlak kan maak.
Boere is 'bereid om te help'
“Boere is van nature gasvry en altyd bereid om te help. Gaan terug na jul gemeenskap en vra hoe julle van diens kan wees. Ons het die vreugde van diens verloor,” het hy gesê.
Botha sê dit is ’n voorreg om by opkomende boere betrokke te raak en van hulp te wees “sodat hulle ook hul drome kan verwesenlik”. “Kom ons word droomskeppers en nie droombrekers nie”, het hy lede genooi.
Op die pad vorentoe sal Agri Gauteng se bestuur hom beywer vir goeie verhoudinge met die provinsie se premier en LUR’e. Boereverenigings moet dieselfde op plaaslike bestuursvlak doen en hulself onmisbaar maak, sê hy.
24 September 2011
