Die Departement van Energie se geïntegreerde hulpbronprogram vir die elektrisiteitsbedryf (IRP2010) behoort begin April gereed te wees, sê mnr. Thabang Audat, hoofdirekteur van energie by die departement.
Hy het op ’n energieberaad in Sandton gesê die omvattende program word op 9 Maart aan die Kabinet voorgelê en verdere prosesse behoort voor einde vandeesmaand afgehandel te wees.
Me. Barbara Thompson, adjunkminister van Energie, het ook op die beraad na die plan verwys en gesê dit sal duidelikheid gee oor die land se energie-verskeidenheid vir die volgende 20 jaar.
Terselfdertyd is ook begin met ’n omvattende energieplan wat na langtermyn-alternatiewe vir die hele energiesektor sal omsien. Daar sal onder meer na die sektor se bydrae tot die Regering se groeiplanne en ’n groener ekonomie gekyk word.
Gebrekkige infrastruktuur
Oor die land se infrastruktuur vir kragverspreiding het sy gewaarsku dat die agterstand met onderhoud en instandhouding jaarliks met R2,5 miljard toeneem. “Studies in 2008 het getoon dat die agterstand toe reeds R27 miljard was. Vandag is dit R30 miljard,” het sy gesê.
Met die sluiting van EDI Holdings (die agentskap wat vir elektrisiteitsverspreiding verantwoordelik was) einde vandeesmaand, sal die Departement van Energie die herstrukturering van die netwerk oorneem.
Daar sal met die Tesourie saamgewerk word om ’n meganisme vir finansiering te skep om probleme met infrastruktuur die hoof te bied.
Lees meer oor die beraad in volgende week se Landbouweekblad.
2 Maart 2011
