Mnr. Christiaan de Jager, wat met hierdie Italiaanse beeste by Badplaas in Mpumalanga, Catuane in die suide van Mosambiek en Montefiascone in Italië boer, beskou dit as ‘n groot oorwinning vir die ras. Dit kom op die regte tyd voor die eerste nasionale Chianinaveiling op 10 November op Badplaas. Die Chianina is die wêreld se grootste bees.
De Jager sê die Chianina is in 1996 in Suid-Afrika geregistreer en is dus as ‘n amptelike ras erken. In 2007, sonder om enige teler of SA Stamboek daaroor te raadpleeg, het Mamabolo dit egter van die register verwyder.
Regter J. Murphy het Mamabolo se handeling in 2014 in die Gautengse afdeling van die Hooggeregshof ongeldig verklaar en ter syde gestel. Mamabolo het dié hofbevel egter geïgnoreer. Toe Keeman Belegging BK in 2017 aansoek gedoen het om 1 881 embrio’s en 30 000 strooitjies semen in te voer, het hy die aansoek geweier op grond daarvan dat die Chianina nie ‘n erkende ras ingevolge die Wet op Veeverbetering is nie.
“Dit is hierdie besluit waarteen geappèlleer is,” sê De Jager.
Adv. Z.Z. Matebezse, SC, prof. M.M. Scholtz en dr. L.E Matjuda het in Pretoria beslis Mamabolo het gefouteer.
De Jager sê die uitspraak bevestig die Chianina is ‘n erkende ras. Dié status moet in die Staatskoerant reggestel word. Hulle het Mamabolo skriftelik verwittig dat hy binne sewe dae op die appèl moet reageer, anders lê hulle ‘n klag van minagting van die hof.
“Die ras kan nou voortgaan met die registrasie van ‘n telersgenootskap ooreenkomstig die aansoek wat geruime tyd reeds op die registrateur se tafel lê. Sodra dit geregistreer is, sal die genootskap as kenner van die ras oor die invoer van teelmateriaal inspraak lewer. Die registrateur se regte word dus ingeperk. Ingevoerde embrio’s en semen kan tot die beskikking van alle telers gestel word en is nie verder onderhewig aan beperkende voorwaardes vir die evaluering van die ras nie.”
Mnr. Keith Ramsey, die vorige registrateur, het op Facebook bevestig die Chianina het Suid-Afrika wettig binnegekom en was sedert die einde van die 1990’s ‘n volledig geregistreerde en erkende ras ingevolge die wet.
Ontvang die nuutste landbounuus en -raad in verskeie bedrywe - teken HIER in vir een van ons nuusbriewe.
