“Ons moet mense identifiseer wat wíl boer. As ek honger is en jy gee vir my grond, sal ek dit vat,” sê me. Keneilwa Nailana, ’n senior landbou-ekonoom van die Land Bank.
Hulpbronne moet eerder beskikbaar gestel word aan mense met 'n passie vir boer, sê sy.
Sy was lid van 'n paneel by die AgriBizniz-beraad by Nasrec, Johannesburg, wat voedselsekerheid bespreek het. Die rol van kleinskaalse boere is deur al die paneellede uitgelig.
Volgens mnr. Chris Sturgess, direkteur van die afgeleide kommoditeitsmark van die JSE, moet 'n balans tussen grootskaalse en kleinskaalse boerderye gevind word. Kleiner hoeveelhede produkte moet ook 'n plek hê, maar dit moet steeds die regte gehalte hê.
Mnr. Dick Muir, oud-Springbok-rugbyspeler en nou direkteur van Just Veggies, het op die belangrikheid van opleiding en mentorskap gewys. “Die landboubedryf is taai. Baie kennis, opleiding en opvoeding is nodig.”
Just Veggies is betrokke by projekte om grond wat ná grondhervorming verval het, weer in produksie te bring. “Dit is ongelooflik om te sien hoe mense reageer wanneer hulle geleer word.”
Volgens Muir is daar baie mense en staatsinstansies wat goed wil doen, maar dit word swak gekoördineer.
Op regeringsvlak word die gebrek aan koördinering erken, het prof. Edith Vries, direkteur-generaal van die Departement van Landbou, Bosbou en Visserye, gesê. “Ons het 'n paar regtig goeie beleidsrigtings, maar op 'n manier raak die gees daarvan verlore wanneer dit in werking gestel word.”
