Goeie reën oor die somergraangebiede sedert die einde van Desember is goeie nuus vir somergraanboere, wat moontlik ’n rekord-oes kan verwag.
Dít volgens mnr. Johan van den Berg, klimatoloog van Santam Landbou.
Van den Berg sê baie plekke in die Noord-Kaap, Noordwes en Wes-Vrystaat het vir die eerste keer in jare van 50mm tot 100mm sagte, deurdringende reën ontvang. Van dié dele het die afgelope jare die ergste onder die droogte gebuk gegaan.
Hy voorspel dat verdere reën van 50mm tot 100mm tot middel Februarie al uitsak, wat moontlik ’n rekord-oes vir talle graanboere kan beteken.
Lang pad na herstel
Ten spyte van die goeie reën, sê Van den Berg daar is nog ’n lang pad wat voorlê vir die omgewing en boere se besighede.
Ondergrondse waterbronne het nog nie herstel nie en opvolgreën is nodig vir saadontkieming en om weiding behoorlik te laat groei. Talle damme se watervlakke is ook nog te laag.
Van den Berg noem ook dat talle boere baie lank in die skuld sal wees, as gevolg van die hoë koste wat weens die droogte aangegaan is.
Die voorspelling vir die winterreënvalgebiede, veral die Wes-Kaap, is ongunstig. Volgens Van den Berg sal die droë toestande in die Wes-Kaap uitbrei en ook in die suidelike dele van die Noord-Kaap en dele van die Oos-Kaap voortduur.
