Die Vrystaat gaan na verwagting nóg ’n rekordjaar vir brande aanteken, met meer as 270 000 ha wat reeds in die slag gebly het.
Mnr. Malcolm Procter, adjunkdirekteur van bos- en veldbrandtoesig by die provinsiale departement van landbou, sê die brandsyfers vir Augustus en September vanjaar is al sowat 60% van die totale syfer van verlede jaar se brandtydperk.
“’n Rede tot kommer is dat vanjaar 277 612 ha in 53 brande in die slag gebly het, terwyl die syfer in September verlede jaar op 202 266 ha vir 114 brande gestaan het. Dit beteken dat vanjaar se brande groter is. Ons staan op ’n gemiddelde van 6 700 ha per dag wat in die afgelope 22 dae van September afgebrand het,” vertel Procter.
Hy sê hy verwag egter dat die syfer vir vanjaar se brande hoër gaan wees omdat ses brande se finale syfers nog uitstaande is.
“Ek verstaan dat 9 000 ha in een van die brande verloor is.”
Stropers
Volgens Procter is ’n ondersoek tans onderweg na ’n brand wat Woensdagaand (21 September) vermoedelik deur stropers begin is. Sowat 2 500 ha het afgebrand.
“Ons het dit in die verlede al beleef dat stropers ’n brand in ’n wildreservaat begin het. Hulle stig die brand veral naby die grensdrade.
"Dit beteken dat wanneer die gras uitloop, wild na die grensdrade gelok word waar die stropers hulle maklik kan skiet of vang,” vertel Procter.
Hy sê hulle verwag om weer ’n rekord aantal hektare aan te teken, aangesien brande tradisioneel ook in Oktober en November in die provinsie voorkom. In Oktober verlede jaar het die provinsie 183 047 ha verloor en in November het sowat 3 700 ha afgebrand.
22 September 2011
