Die 38-jarige me Madeleine Raubenheimer van die Loskopvallei-klub en wenner van die liggewig-afdeling, het die 203km oor drie agtereenvolgende dae in die vinnigste tyd van 8 uur 4 minute en 25 sekondes op Davey Jones (HD) afgelê (8:04:25).
Me. Rinie White, een van die organiseerders, sê Raubenheimer is ’n gesoute ruiter wat in haar deelname aan die uithourit die afgelope ses jaar een keer haar klas gewen en gewoonlik onder die voorste vyf ruiters geëindig het. Sy spog onder meer ook met ere-kleure in die sport.
Raubenheimer se wentyd is nou die rekordtyd in die liggewigafdeling.
Die wenner van die swaargewig-klas, mnr. Johann Nieuwoudt, het die rekordtyd van Jaco Ferreira van 2005 met meer as ’n minuut verbeter. Sy tyd was 8:36:48. Nieuwoudt op die Anglo-Arabier-reun Vonk, is ’n mielieboer van Schweizer-Reneke in Noordwes en vanjaar was sy vierde deelname aan die uithourit.
Die wenner in die standaardgewig-klas was mev. Mariëtte Visser van die plaas Spioenheuvel in die distrik Warrenton in die Noord-Kaap.
In die afdeling vir juniors het die 19-jarige Jan-Louis Bezuidenhout van die Rand-klub in Johannesburg op Jozami Ravelity gewen, met Chandri Human van Hartswater op El-Jellabi Ashan as die beste kinderruiter.
