Mnr. Piet van Zyl, 'n bekende boer van Mokopane en sy vrou, Tilla, is Saterdagaand op hul plaas in die Immerpan-omgewing oorval en vermoor. Beide is met 'n 9mm pistool geskiet en hul lyke is Sondagoggend deur 'n familielid in hul slaapkamer gevind.
Van Zyl het vroeër jare met gesaaides op die Springbokvlakte geboer en was veral bekend vir sy groot katoenaanplantings. Later jare het hy hom op renosters toegespits en dié diere ten duurste beskerm in die hoop dat hy later wettiglik met renosterhoring sal mag handel dryf.
Hy is 'n jaar gelede in hegtenis geneem nadat hy in 'n lokval gelei is om renosterhoring onwettig aan 'n agent te verkoop. Hoewel die verkoop nie wettig was nie, het bronne na aan Van Zyl bevestig dat hy wel die wettige eienaar van die renosterhorings was.
Hoewel die kluis tydens Saterdagaand se aanval oopgebreek is, is dit nog nie duidelik of iets gesteel is nie. Ondersoekbeamptes kon ook nie sê of die aanval verband hou met renosterhorings nie.
Stropers
Van Zyl moes gereeld pogings om sy renosters te stroop afweer. Verlede jaar,in die maand voor hy in hegtenis geneem, het sewe pogings om renosters te stroop op sy plaas voorgekom.
"Elke keer het die stropers gevlug, net om 'n paar dae later terug te kom. Dit nadat daar al nege renosters by hom gestroop is die afgelope jaar of twee," het die bekende megaboer en vriend van Van Zyl, mnr. Piet Warren, aan Landbouweekblad vertel.
'n Tiende renoster is Desember geskiet, ten spyte van die gewapende wagte wat aangestel is om die renosters op te pas.
Teen Maandag kon die polisie bevestig dat daar vyf aanvallers was en dat hul spore na 'n nabye teerpad gelei het waar hulle vermoedelik deur 'n voertuig opgelaai is.
Intussen het die TLU SA boere en die landbougemeenskap gewaarsku om hulle veiligheidsmaatreëls op te skerp te midde van 'n hernieude reeks aanvalle op plase.
Benewens die Van Zyls, is mnr. Anton Smuts van Kinross, Mpumalanga, Saterdag tydens 'n aanval vermoor. Mnr. James Munroe van Baberton is Sondag oorval deur twee aanvallers. Munroe het die aanval oorleef maar 'n kopwond opgedoen.
