As die situasie met renosterstroping voortgaan soos wat tans die geval is, kan dié diere binne 10 jaar uitsterf, sê die vereniging vir private Renoster-eienaars (PROA).
Mnr. Pelham Jones, voorsitter, sê ontleders het bevind dat as die stropingsyfers van verlede jaar ongestoord voortgaan, dié diersoort net nog vir ’n dekade lank sal bestaan.
Hy sê volgens Sanparke se amptelike syfers is 448 renosters verlede jaar in Suid-Afrika vir hul horings afgemaai. Dit is ’n styging van 35% teenoor 2010 se amptelike syfer van 333 renosters.
“Hierdie syfers is ’n aanduiding dat die situasie heeltemal buite beheer is. Dit lyk asof stroping toegeneem het ondanks die ontplooiing van die Weermag in die Kruger Nasionale Park en dit is baie kommerwekkend,” aldus Jones.
Wettige handel
Jones sê een van die oplossings wat die PROA voorstel, is om handel in renosterhoring wettig te maak. Dié horings moet teen dieselfde prys verkoop word as dié wat tans gevra word.
Sodoende kan die Regering en die bedryf die waarde van ’n lewende renoster verhoog, want tans is ’n dooie renoster vir ’n stroper meer werd as ’n lewende een.
“Dit is so dat voorvalle van stroping steeds sal voorkom al word dié handel gewettig, maar soos met die drankwet sal die misdaad beslis afneem,” verduidelik Jones.
Die PROA het verlede jaar ’n brief aan me. Edna Molewa, die Minister van Omgewingsake, gerig om haar te vra om die moontlikheid van dié handel te ondersoek en te oorweeg. Dié brief is onder aan die berig beskikbaar.
Nog agt
Intussen berig Beeld (11 Januarie 2012) dat agt renosterkarkasse in die Kruger-wildtuin gevind is. Luidens die berig is ál die diere se horings verwyder. Die meeste van die diere is na bewering die afgelope week geskiet, met van die karkasse wat glo baie vars was.
Vier karkasse is in die omgewing van die Pretoriuskop-kamp gevind, twee naby Onder-Sabie en twee in die omgewing van die Krokodilbrug. ’n Grootskeepse soektog is deur veldwagters en Weermaglede onderneem in ’n poging om die vermeende stropers op te spoor.
* Vind aangeheg PROA se brief aan me. Edna Molewa.
Bron: Beeld
11 Januarie 2012
