Altesaam vyf vermeende renosterstropers is die afgelope naweek in ‘n natuurreservaat in KwaZulu-Natal vasgetrek, sê Ezemvelo KZN Wildlife.
Luidens ‘n berig op News24.com sê mnr. Bandile Mkhize, bedryfshoof van dié organisasie, die groep wat afkomstig is van Mahlabathini, Hlophenkulu en eZihlabeni, is oor die naweek aangekeer.
Die ondersoekspan het ook op ses wapens beslag gelê, waarvan drie nie gelisensieerd is nie.
Drie renosters in 10 dae
Die reservaat was die teiken van renosterstropers met drie renosters wat die afgelope 10 dae hier vir hul horings doodgemaak is.
Mkhize sê die eerste van die drie renosters se karkasse is op 29 September gevind deur bewaarders, terwyl die ander twee ‘n dag later ontdek is. “Die arrestasies is ‘n groot deurbraak vir die stryd teen renosterstropery en dit het ons personeel baie nodige motivering gegee.”
Die voorvalle bring die aantal renosters wat vanjaar deur stropers in KZN provinsie gedood is, op 17 te staan. Die vermeende stropers sal binnekort in die plaaslike landdroshof verskyn.
Regering hou renosterberaad
Intussen bied me. Bulyewa Sonjica, Minister vir Omgewingsake en Waterwese, Dinsdag en Woensdag (5 en 6 Oktober) ‘n renosterberaad in Pretoria aan. Tydens die beraad sal die minister, asook lede van die Suid-Afrikaanse Polisiediens en Nasionale Vervolgingsgesag afgevaardigdes toespreek.
Die voortydige afsaag van renosters se horings om te verhoed dat stropers hulle doodmaak en ‘n moontlike moratorium op die jag van witrenosters vir trofees sal ook bespreek word.
5 Oktober 2010
