Vier groepe renosterstropers is die afgelope maand in die distrik Waterberg in Limpopo aangekeer danksy goeie samewerking tussen boere, bewaringsinstansies en die SA Polisiediens.
In die jongste voorval het polisie die oggend van 1 September gereageer op inligting dat twee voornemende stropers in ’n bakkie vanaf Vaalwater na die Entabeni-natuurreservaat naby Mokopane op pad is om ’n renoster te skiet.
Die voertuig is net buite Vaalwater deur die plaaslike polisie afgetrek en twee mans is in hegtenis geneem nadat ’n .308 jaggeweer met ’n knaldemper, ammunisie, byle en messe in hul besit gevind is.
Net ’n week vantevore is ’n groep van vier mans op heterdaad betrap waar hulle op ’n plaas naby Doorndraaidam tussen Mookgophong en Mokopane renosters gejag het. Spore is gekry waar die vier afgelaai is en die polisie het dadelik die hulp van die Spoorsnyers ingeroep.
Hulle het boere in die omgewing oor die plaaswag se radiostelsel se hulp ingeroep om die omliggende paaie af te sper. ’n Halfuur nadat met die operasie begin is, is die vier vermeende stropers aangekeer toe hulle terugbeweeg na die hoofpad waar hulle vermoedelik weer opgelaai sou word. ’n Jaggeweer met ’n knaldemper, ammunisie, ’n verkyker, byle en messe is in die verdagtes se besit gevind.
Net ’n week voor dié voorval is vyf mans naby Vaalwater in hegtenis geneem in verband met twee renosters wat die vorige week op ’n plaas in die Stockpoort-
omgewing geskiet is.
In nóg ’n voorval is agt vermeende renosterstropers, onder wie ’n polisiereservis van Johannesburg, op 16 Augustus deur die polisie in hegtenis geneem.
