’n Onafhanklike forensiese spesialis is deur die eienaars van die Far End Dairy-melkverwerkingsonderneming in die KwaZulu-Natalse Middelland aangestel om die oorsaak van ’n brand by die fabriek vas te stel.
Far End Dairy, wat deur die Jasat-familie besit en bedryf word, het voorraad, verpakkingsmateriaal en -toerusting, bou-infrastruktuur en ander bates van miljoene rande in die brand verloor.
Mnr. Brian Zuma, woordvoerder van die distriksmunisipaliteit Umgungundlovu, sê owerhede het op Sondag 8 Januarie om 22:50 ’n oproep om hulp ontvang. Brandbestryders van vier brandweerstasies is onmiddellik na die Far End Dairy-perseel op Merrivale gestuur.
“Die fabriek se deure was almal gesluit en brandbestryders moes deure breek om toegang te verkry om die brand te begin bestry. Die brand was die volgende oggend teen 05:30 onder beheer.”
Volgens mnr. Nadeem Jasat, hoofbestuurder van Far End Dairy, is hy en sy gesin geskok oor die verliese en skade wat deur die brand aangerig is.
Hy sê ’n personeellid wat by die fabriek aangekom het om aflewerings vir die volgende dag voor te berei, het op die brand afgekom en die noodoproep gemaak. Dié personeellid het die teenwoordigheid van gees gehad om al Far End Dairy se vragmotors onmiddellik na ’n veilige afstand van die brandende fabriek weg te skuif.
“Al ons voorraad is deur die brand vernietig en sowat 80% van die gebou is beskadig. Brandbestryders vermoed ’n elektriese kragstuwing was die oorsaak van die brand, maar ons het ’n spesialis aangestel om ’n deeglike forensiese ondersoek te doen.”
Hy voeg by dat hy en sy gesin vasbeslote is om Far End Dairy se bedrywighede so gou moontlik op dieselfde perseel te herbou. Ná verwagting sal volledige herstelwerk tot 12 maande duur. “Ons moet. Ons moet weer op ons voete kom.”
Far End Dairy, wat in 1999 gestig is, verwerk daagliks 20 000 liter tot 30 000 liter en verpak gegeurde en gewone langlewe-melkprodukte, asok maas en vars melkprodukte onder Far End Dairy se Mad Max- en Fair Value Dairy-handelsmerke.
Mnr. Flip Jacobs van Desmanda Milk, wat melk aan Far End Dairy lewer, sê melkboere wat onverwerkte melk aan die fabriek lewer, word nie geraak deur die feit dat die fabriek sy bedrywighede weens die brand moet opskort nie. Dié melk word onmiddellik na ander melkverwerkingsondernemings herlei. Van dié ondernemings het aangebied om melk namens Far End Dairy te verwerk totdat die Jasat-familie hul fabriek weer aan die gang kry.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
