Die reuse Suid-Amerikaanse Victoria-waterlelie, wat tans by die Botaniese Tuine van die Noordwes Universiteit se Potchefstroomkampus groei, blom vir die eerste keer in sowat 50 jaar in Suid-Afrika.
Mnr. Martin Smit, kurator by die tuine, sê ‘n bloeisel het Maandag (21 Februarie) bo die water uitgekom, en die bloeisel het gedurende die nag oopgegaan. “Die blom het gisteraand oopgegaan en die hele glashuis na pynappel laat ruik. Die blom gaan nou oor dag weer toe en maak vanaand weer oop, dié keer pienk,” verduidelik Smit.
‘n Victoria-waterlelie blom net vir 48 uur nadat die blom die eerste keer oopgemaak het. Dit is die eerste keer in sowat 50 jaar wat die lelie in Suid-Afrika groei, want dit is ‘n groot uitdaging om die sade teen die regte temperature van Amerika hierheen te vervoer en te bewaar.
Die vorige lelies het vir twee seisoene aan die begin van die 1960’s by die Universiteit van Stellenbosch se Botaniese Tuine gegroei.
Van wit na pienk of rooi
Volgens inligting van The Hudson Gardens in Amerika sal die blom sowat ‘n dag na die bloeisel verskyn, oopgaan.
Dit gebeur gewoonlik in die aand, en dan is ‘n reuse groot wit blom – wat soms in die nag kan gloei en vroulik is – te sien. Die blom straal hitte uit en skei ‘n sterk soet geur af om insekte te lok sodat dit bestuif kan word.
Die volgende dag maak die blom toe om die insekte vas te vang en so bestuiwing te probeer verseker. Teen sononder van die tweede dag maak die blom weer oop, dié slag is dit wel pienk of rooi, en die insekte word vrygelaat.
Die kleurverandering dui aan dat die blom van vroulik na manlike verander het gedurende die bestuiwingsproses. Die volgende dag verdwyn die blom onder die water in, om saad vir die volgende jaar se bloeityd reg te kry en te bewaar.
Die reuse bloeisel. Foto: VERSKAF
22 Februarie 2011
