Mnr. Willem le Grange, plaasbestuurder by Indigo Fruit Farming buite Mosselbaai, het weer vanjaar bewys hy ken van reusepampoene kweek. Op Heidelberg se reusepampoenfees, wat op 25 en 26 Maart plaasgevind het, het hy weer die rekord laat spat met sy bielie van ’n pampoen wat die skaal op 904,5 kg getrek het – genoeg vir sowat 20 000 pampoenkoekies.
Hy het verwag dat dié pampoen ’n wenner sou wees en vertel dat die pampoen se suster en ma selfs swaarder gemeet het. “ ’n Mens moet senuwees van staal met hierdie ding hê. Toe ons hom op die tape gemeet het, het hy maar 783 kg of so geweeg.”
Mnr. Piet Lotz, wat in 2020 die rekord vir swaarste pampoen opgestel het, het vanjaar tweede gekom met sy pampoen van 839 kg. Me. Elizna Lotz het derde plek behaal met haar pampoen van 730 kg.
Die pampoen, wat Sophia gedoop is aangesien die saad waarmee sy gegroei is uit Spanje kom, is in September verlede jaar ontkiem en in Oktober uitgeplant. Gedurende haar spitsgroeityd het sy daagliks 20 kg swaarder geword.
Le Grange het ’n soortgelyke metode as met sy vorige poging ingespan om die pampoen te kweek. Die belangrikste bestanddeel vir die kweek van ’n reusepampoen, is volgens hom aandag.
Hy sê hy is beslis van plan om volgende jaar weer aan die fees deel te neem en beoog om sy rekord tot ’n ton te verbeter. Hy het ’n ander pampoen vanjaar gehad wat teen dag 30 van sy groeitydperk 90 kg swaarder as verlede jaar se wenpampoen van 867,5 kg was. Ongelukkig het hy dié pampoen se hoofstam verloor.
