Geen chemiese middels is nog vir die bestryding van die herfs-kommandowurm in Suid-Afrika geregistreer nie, maar hier is riglyne.
Dit is nutteloos om die herfs-kommandowurm te probeer beheer as die larwes al die koppe binnegedring het, waar hulle teen chemiese beheermiddels beskut is. Só word boere in ’n voorlopige interim-gids met beheer-riglyne vir dié spesie gewaarsku.
Die Departement van Landbou, Bosbou en Visserye het dié gids met die hulp van verskeie kenners saamgestel, vir voorlopige gebruik totdat taksonomies bevestig is dat die wurmplaag wat boere van Limpopo tot in Noordwes en die Vrystaat teister, wel die vernietigende indringer herfs-kommandowurm is. (* Dié bevestiging is pas deur die Minister van Landbou op Vrydagmiddag, 3 Februarie gedoen.)
Die departement wys in die gids daarop dat geen chemiese middels nog in Suid-Afrika vir beheer van hierdie spesie geregistreer is nie. Die raad aan boere is om beheermiddels te probeer wat vir die beheer van ander Lepidoptera-plae op mielies geregistreer is.
Hierdie middels werk:
Die aktiewe bestanddeel indoxacarb is getoets en het gewerk. Dis vanaf DuPont en Villa Crop Protection te kry. Die Du Pont-produk is vir mielies geregistreer.
Dit lyk of lufenuron werk, maar dit is nie vir mielies geregistreer nie. Produkte is van Villa Crop Protection, Meridian Agrochemical Company en Syngenta te kry.
Chlorantraniliprool is baie doeltreffend, maar neem kennis dat dit ’n diamied is, en dus maklik tot die ontwikkeling van weerstandigheid kan lei. Dit moet met groot omsigtigheid toegedien word, en slegs die hoeveelheid kere wat op die etiket voorgeskryf is. Produkte is van DuPont en Syngenta te kry. ’n Produk is van Syngenta te kry wat teen stamboorders op mielies geregistreer.
Emamektien bensoaat is ook met sukses getoets. Dit is nog nie vir gebruik op mielies in Suid-Afrika geregistreer nie. ’n Produk is van Syngenta te kry.
Spinosad is ook met gemengde sukses getoets, maar is ook nie vir gebruik op mielies geregistreer nie. Produkte is van Dow AgroScience en Efekto te kry.
Chlorpyrifos is vir beheer van Lepidoptera op mielies geregistreer, maar dit moet nog vasgestel word of die insekte daarteen bestand is.
Thiodikarb is ’n karbamaat, en dit word vermoed dat die insekte daarteen bestand mag wees. ’n Vinnige vooraf-toets moet dus eers gedoen word om vas te stel of dit doeltreffend is. ’n Produk wat vir gebruik op mielies geregistreer is, is van Bayer CropScience te kry.
Metomiel is vir gebruik op mielies geregistreer, maar is ook ’n karbamaat, wat dus ook weens weerstandigheid ondoeltreffend kan wees. Produkte kan van Arysta LifeScience, Villa Crop Protection, Adama, Nulandis (Plaaskem), Cipla Agricare, DuPont en Bitrad gekry word.
Benfurakarb is vir gebruik op mielies geregistreer (ook in kombinasie met piretroïede, maar by hierdie aktiewe bestanddeel is daar ook die risiko van weerstand-ontwikkeling. Produkte is van Villa Crop Protection, Meridian Agrochemical-maatskappy en Dow AgroScience te kry.
Spuittoedienings van die bakterie Bacillus thuringiensis (Bt) se kurstakii-serotipe mag ’n moontlike biologiese oplossing wees, maar dit sal afhang van watter sub-tipe suksesvol teen die larwes ingespan kan word, asook die grootte van die larwes wanneer dit toegedien word. Geen hiervan is vir mielies geregistreer nie. Produkte is van Valent BioSciences (Philagro), Villa Crop Protection, Becker Underwood, Agro-Organics en Plant Health Products te kry.
Spuit betyds
Die aanbeveling is dat beheermiddels in die vroeë ontwikkelingstadia van die larwes toegedien word. Hoewel hierdie wurms meestal mielies aanval, kan dit ook van tyd tot tyd na byvoorbeeld koring, katoen en grondbone beweeg. Hou dus alle gewasse noukeurig dop.
Meer inligting, soos produkte se handelsmerk-name, is op die CropLife SA-databasis beskikbaar.
