Die polisie se riglyne rondom die hantering van grondbesettings en betreding sal help om eenvormigheid binne die polisiediens te bewerkstelling wat die hantering van dié soort insidente aangaan, sê Agri SA in ’n mediaverklaring.
“Suid-Afrikaanse wetgewing beskerm die regte van wettige grondeienaars, daarom verwelkom Agri SA die riglyne wat die polisie ontwikkel het ten opsigte van hul rol en verantwoordelikheid om te verseker dat alle polisielede binne die omvang van die toepaslike wetgewing en beleid optree wanneer hulle handel met klagtes van betreding, grondbesetting en onwettige uitsettings,” sê mnr. Kobus Breytenbach, voorsitter van Agri SA se landelike veiligheidskomitee.
Die riglyne sal na verwagting ’n raamwerk voorsien waarbinne die polisie en boere hande kan vat en “is dit ook belangrik vir grondeienaars om te weet wat die polisielede se verantwoordelikheid is met die hantering van hierdie insidente en hoe hulle die polisie moet nader om ‘n klag te lê,” sê Breytenbach.
Polisie moet optree
Indien dit duidelik is dat die Wet op Betreding oortree is, moet die polisie stappe neem. “Dit is belangrik dat grondeienaars daarvan kennis neem dat die polisie nie mag weier om ’n saak van betreding te open nie, al is dit duidelik dat grondbesetting nog nie plaasgevind het nie. Selfs terwyl die persone nog in die proses is om strukture op te rig, mag ’n saak van betreding geopen word,” sê Breytenbach.
Dis ook belangrik vir grondeienaars om kennis te neem dat dit moeilik sal wees om betreding te bewys in gevalle waar sekere roetes op hul grond gereeld as deurgange gebruik is.
“Dit is belangrik dat ons boerelede met die polisie saamwerk en alle gevalle van betreding en grondbesetting aanmeld, asook by hulle provinsiale organisasie. Ons beveel ten sterkste aan dat hierdie riglyne gebruik word om ‘n aksieplan op plaaslike vlak saam te stel met behulp van die polisie ten einde die situasie doeltreffend aan te spreek,” sê Breytenbach.
