Rioolstorting deur die Mafube-munisipaliteit veroorsaak groot kommer onder inwoners van Frankfort en Villiers. Dié riool spoel volgens AfriForum ook na plase oor en lei tot veevrektes.
“Die water van die Vaalrivier is so besoedel dat ’n mens plek-plek die karkasse van diere sien wat moontlik weens dieselfde rede gevrek het,” vertel mnr. Pieter van der Westhuizen, verteenwoordiger vir die Demokratiese Alliansie (DA) in die Fesile Dabi-distriksmunisipaliteit. “Ek het toetsresultate van die Vrede-dierekliniek wat so ver terug as 2008 aangeteken het dat beeste weens rondewurms, wat ’n gevolg is van riool-inname, gevrek het.”
Terugvoer
Volgens Van der Westhuizen is die munisipaliteit al genader vir ’n plan om die probleem op te los, maar nog geen terugvoering is ontvang nie. “Ons het geen terugvoering van die Mafube-munisipaliteit ontvang nie en ons sal stappe teen hulle doen.”
Verder het AfriForum en Van der Westhuizen in ’n brief aan die Departement van Waterwese gevra om ’n verslag te sien wat die departement ná ’n ondersoek by die Mafube-munisipaliteit saamgestel het. “Die Departement van Waterwese is daarvoor verantwoordelik om die munisipaliteit se kriminele nalatigheid aan te pak. AfriForum het ?n plan van die departement gevra.”
Van der Westhuizen sê die verslae sal deeglik bestudeer word en die situasie sal behoorlik gemonitor word om te verseker voorstelle en regulasies word uitgevoer en stappe word teen die verantwoordelike persone gedoen.
