Die onderstaande navorsing dui daarop dat buitelandse beleggers in die twee weke tot 7 April 2017 sowat R 22,2 miljard in Suid-Afrikaanse staatseffekte belê het. Dit is die grootste bedrag oor ‘n twee weke-tydperk wat nóg aangeteken is. Dit is in skrille teenstelling met die algemene verwagting na aanleiding van die onlangse afgradering na sogenaamde rommelstatus van Suid-Afrika se staatskuld.
Tabel 1:
As gekyk word na die invloei van fondse vanaf die begin van 2017 tot en met 7 April 2017 was die totaal wat in staatseffekte belê was, altesaam R 35,658 miljard. In die geval van aandele is die bedrag ‘n uitvloei van R 21,736 miljard.
Grafiek 2:
Uit die bostaande kan afgelei word dat buitelanders op soek is na opbrengs, of “yield” in Engels. Met ander woorde, ten spyte van Suid Afrika se rommelstatus is buitelanders steeds bereid om ‘n kans te waag om hoër rentekoerse te verdien.
Tot voor die afdanking van mnr. Pravin Gordhan as Minister van Finansies was die gevoel in die mark dat ‘n rentekoersverlaging van 0,25% te wagte is in die oorblywende deel van 2017. Dit wil ook lyk asof die trajek van rentekoersverhogings in Amerika nie so steil gaan wees in 2017 as wat voorheen verwag is nie. Die gevolg is dat die rentekoersdifferensiaal tussen Suid Afrika en die VSA steeds relatief groot gaan bly. Dit is in 'n vorige artikel uitgewys.
Bostaande, en die plaaslike opposisiepartye wat teen pres. Jacob Zuma optogte hou, mag deels verklaar waarom die rand onlangs begin versterk het teenoor die dollar.
Grafiek 3:
‘n Laaste interessante punt is die onderstaande grafiek. Dit dui aan wat die vlak van Suid-Afrika se kredietgradering was sedert 1994. Oud-presidente Nelson Mandela en Thabo Mbeki het hulself goed van hulle take gekwyt. Lesers kan hulle eie afleiding maak oor die laaste paar jaar se prestasie.
Grafiek 4:
Om objektief te wees moet in gedagte gehou word dat die hulpbron-groeifase van die vorige dekade sedert die “credit crunch” baie afgeplat het, en meeste lande wat hulpbron-gebaseerde ekonomieë het, begin sukkel het, selfs Australië.
* Edwin Smit is ‘n portefeuljebestuurder by BVG Financial Solutions, ‘n Gemagtigde Finansiële Dienste Verskaffer van die FSB, met lisensienommer FSP 39889, en ook ‘n geregistreerde JSE handelaar van BVG Commodities (Lid van die JSE). Hy is ‘n gereelde spreker op RSG. Sy kontakbesonderhede is: (012) 484-4013 of edwin.smit@bvg.net. Die volgende dienste word gebied:
Wisselkoers verskansing op BVG se Yield-X (JSE) lisensie. Lesers kan inteken op die daaglikse valuta verslag.
Die ruil van fisiese kontant in assosiasie met Investec: Omskakeling van rande na dollars, euros en ponde, en vice versa.
Aandele protefeulje bestuur in assosiasie met Momentum SP Reid. Lesers kan inteken op die daaglikse aandele verslae.
