Danksy goeie oeste en voldoende voorrade van ingevoerde voedselsoorte soos koring en rys hoef Suid-Afrika en ander lede van die Suider-Afrikaanse Doeane-unie (Sadu) nie bekommerd te wees oor tekorte aan voedselvoorrade of landbou-insette, het me. Thoko Didiza, minister van landbou, grondhervorming en landelike ontwikkeling, gesê.
Didiza het met voedselverwerkers, leiers in die vrugte- en graanbedryf, landbouhandelsgroepe en -organisasies vergader om die beskikbaarheid van voedsel en landbou-insette in die komende maande te midde van konflik tussen Rusland en Oekraïne te bespreek.
“Die onderskeie belanghebbendes het hulle daartoe verbind om inligting oor die stand van voedselproduksie te verskaf wat ons in staat sal stel om beter te beplan en te reageer indien dit nodig wou word.”
Op die vergadering is die behoefte aan die bevordering van inklusiewe groei in die landbousektor op lang termyn bespreek. Didiza het gesê ten einde hierdie behoefte te bevredig, sal beperkinge op die sektor se groei, onder meer finansiering vir nuwe toetreders, siektes, plae en die verbetering van die plaaslike vermoë om kunsmis te vervaardig aandag geniet.
Dié ingrypings vorm deel van die departement se meesterplan vir die landbou en landbouverwerking wat binnekort bekend gestel sal word.
