Terwyl Rusland se betrekkinge met die Westerse wêreld verbrokkel, kan deure oopgaan vir Suid-Afrikaanse uitvoerders van veral vrugte, meen Agri SA se senior ekonoom, mnr. Dawie Maree.
Goeie handelsbetrekking bestaan reeds tussen Suid-Afrika en Rusland en plaaslike bedryfsorganisasies werk hard daaraan om hul markaandeel in dié land uit te brei.
"Verskeie van ons bedryfsorganisasies, soos die Sitruskwekersvereniging en andere, reis gereeld na Rusland om geleenthede te ontwikkel. Hulle het ook almal in die verlede aan die groot voedselskou in Moskou deelgeneem, juis om die Russiese mark te ontwikkel," sê Maree.
In reaksie op sanksies wat vroeër deur die Weste en ander lande aangekondig is oor Moskou se ingryping in die Oekraïne, het Rusland teruggeslaan deur alle voedselinvoer uit die Amerika, die Europese Unie, Kanada, Noorweë en Australië stop te sit.
Voor die sanksies het Europese uitvoer na Rusland €120 miljard per jaar beloop. Rusland was ook onder die topdrie markte vir Amerikaanse hoender met VSA$303 miljoen se hoenders wat in 2013 daarheen uitgevoer is. Die Russe het verlede jaar ook VSA$231 miljoen se vrugte uit die Amerika ingevoer. Ander groot verloorders is Nederlandse kaas, Noorweegse salm en vrugte uit Spanje. Die Russe koop jaarliks die helfte van die Poolse appel-oes.
Al dié uitvoerders moet nou ander markte soek. Maree sê daar is 'n wesenlike risiko dat van hierdie produkte in Suid-Afrika gestort kan word. "Hoewel ek dink ander lande in Afrika sal moontlik eerste geteiken sal word," sê hy.
