Die Suid-Afrikaanse en Argentynse department van landbou het ’n ooreenkoms vir beter samewerking onderteken. Luidens ’n verklaring het dr. Pieter Mulder, Suid-Afrika se Adjunk-minister van Landbou, Bosbou en Visserye dié land die afgelope week besoek om beter landbouverhoudinge met mnr. Julioan Dominguez, die Argentynse minister van landbou, visserye en voedsel, te bespreek.
Die ooreenkoms is in Buenos Aires onderteken ná Suid-Suid-samewerking tussen Afrika-lande en Suid-Amerika teen die agtergrond van die veranderde ekonomiese en landbou-magsbalanse in die wêreld ook bespreek is.
Moenie onderdrukking toelaat
“Suid-Afrika en Afrika kan nie toelaat dat die Europese, Amerikaanse en Asiatiese ekonomiese magsblokke ons ignoreer en irrelevant probeer maak nie,” aldus Mulder.
Mulder meen ook dat bilaterale handel tussen die twee lande op ’n meer gelyke basis moet ontwikkel. “Tans is die balans te sterk in Argentinië se guns. Hierdie ooreenkoms moet uitloop op ’n wen-wen-situasie vir al twee lande en moet die uitvoermoontlikhede van Suid-Afrikaanse boere verder verbeter.”
Navorsing en tegniese kennis
Die ooreenkoms onderneem ook beter samewerking tussen die twee lande ten opsigte van landbounavorsing en die uitruil van tegniese landboukennis. Dít kan lei tot gesamentlike navorsingsprojekte oor landbouprobleme wat in al twee lande as voorrangsake geïdentifiseer word.
Argentinië het, vanweë sy toegepaste landbounavorsing, die afgelope paar jaar daarin geslaag om dié land van ’n voedselinvoer- na ’n voedseluitvoerland te verander. Dié land se 40 miljoen inwoners produseer tans genoeg voedsel vir 400 miljoen mense.
12 April 2011
