Dit is belangrik dat die Suid-Afrikaanse rooivleisbedryf homself posisioneer vir moontlike uitvoer na China.
Mnr. Lardus van Zyl, voorsitter van die nasionale Rooivleisprodusente-organisasie (RPO), sê dit lyk al meer asof daar positiewe potensiaal vir so ’n stap is, wat uiters bemoedigend is vir die plaaslike bedryf.
Van Zyl het op die RPO se 25ste nasionale kongres gesê die vertroue in die bedryf is steeds hoog en hy is uiters optimisties oor die vooruitsigte in die bedryf. "Met die rooivleisbedryf se aansoek vir die instelling vir ’n volgende periode van die statutêre heffing, sal dit moontlik wees om kapasiteit in die bedryf verder te verhoog," sê hy.
Van die positiewe neiging wat die afgelope jaar deur die bedryf weerspieël is, was die feit dat die beesvleisprodusenterys in 2014 met 17% gestyg het, terwyl die produsenteprys van lamsvleis met 21% gestyg het. Die C-grade van rooivleis het egter nie in dieselfde tempo verhoog nie.
Volgens Van Zyl was die herwinning van Suid-Afrika se status as bek-en-klouseer-vrye sone ‘n hoogtepunt vir die bedryf in die afgelope jaar. "Dit is krities noodsaaklik dat dié status ten alle koste behou sal word en die RPO sal alles in sy vermoë doen om die owerhede se hand in dié verband te sterk. Die internasionale organisasie vir dieregesondheid, die OIE, sal later vanjaar weer ’n inspeksie van Suid-Afrika se veeartsenykundige dienste doen en dit is belangrik dat ons huis in orde sal wees en bly."
Hy het ook namens die RPO die onlangs maatreëls wat die Departement van Landbou aangekondig het, waarvolgens invoer vanaf buurlande gestandaardiseer word, verwelkom.
"Die RPO is die eerste keer in die geskiedenis tevrede dat die plaaslike rooivleisbedryf voldoende beskerm word," sê hy.
