‘n Suid-Afrikaanse boer, mnr. Brian Patrick Roach (64), is Saterdag (11 Februarie) in hegtenis geneem en staar klagte van terrorisme en bedrog in die gesig.
Hy het vlugtig in die Wynbergse magistraatshof noord van Johannesburg verskyn, luidens ‘n berig van Bloomberg.
Roach het volgens die aanklagdokumente teen hom in sedert Junie verlede jaar dreigende briewe en e-posse gestuur aan die Britse departement van omgewingsake, voedsel en landelike sake waarin hy sowat R29 miljoen in Krugerrande eis en dreig om die Britse vleisbedryf te kelder deur ‘n besmetting van bek-en-klouseer.
Die Suid-Afrikaanse Polisiediens, Londense metropolitaanse polisie se teenterreur-afdeling en die Amerikaanse Federale Buro vir Ondersoeke (FBI) het saamgewerk en het bewyse dat Roach nooit die vermoë gehad om sy dreigemente deur te voer nie.
Hy is tans in aanhouding by die Bramley-polisiestasie in Johannesburg en volgens mnr. Mthunzi Mhaga, woordvoerder vir die Nasionale Vervolgingsgesag, sal hy op 18 Februarie om borgtog aansoek doen, wat die staat sal teenstaan.
Roach sê hy het die dreigemente gemaak omdat hy wit boere wat van hul grond verdryf is in Zimbabwe wil help, luidens ‘n berig op TimesLive.
Lees meer oor die saak op The Daily Maverick. Hier is ook ‘n videogreep te sien.
15 Februarie 2011
