Suid-Afrikaanse boere in die Kongo het binne ’n kort tydjie ’n indruk op dié land se president gemaak, aldus dr. Pieter Mulder, Adjunkminister van Landbou, Bosbou en Visserye.
Luidens ’n mediaverklaring het Mulder die Kongo verlede week besoek, waar mnre. Denis Sassou Nguesso, Kongolese president, en Rigobert Maboundou, minister van landbou in die Kongo, groot lof vir die boere gehad het.
Beïndruk
Die twee amptenare is veral beïndruk met wat die boere al in hul eerste paar maande in die land vermag het. Die boere het reeds 1 200 ha ontbos op die staatsplaas van 85 000 ha waar hulle woon. Hulle het ook waterpype en pompe herstel, wat tot gevolg het dat die plaaslike gemeenskap weer lopende water het.
Die minister het ’n video van die boere se suksesse gemaak om dit aan die president te vertoon. Verder is die projek ook tot ’n presidensiële projek verklaar.
“Dit is met gemengde gevoelens dat ’n mens luister na die waardering wat die plaaslike politici vir die Suid-Afrikaanse boere se kundigheid en hardwerkendheid het.
"Eers wanneer leiers en die bevolking van Suid-Afrika die waarde van hierdie boere begin besef, sal ons die Suid-Afrikaanse verlies aan sulke boere en aan landboukundigheid kan omkeer,” sê Mulder.
* Mulder het dié Afrika-land besoek om Suid-Afrika by die Verenigde Nasies se Voedel en Landbou-organisasie (FAO) se Afrika-kongres in Brazzaville te verteenwoordig. Hy was een van die sprekers by die geleentheid en het sodoende met die president en minister gesels. Volgens Mulder was die algemene boodskap wat uit die kongres gevolg het dat Afrika-lande al meer vir hulself en mekaar moet begin sorg in plaas daarvan om bakhand voor ontwikkelde lande te staan.
Verder het leiers ook gepraat oor die moontlikheid om ‘n trustfonds te stig waartoe alle Afrikalande kan bydra. Dié fonds kan dan gebruik word om lande in nood by te staan. Dit kan dan ook as ‘n basis die nom makliker hulp van groot lande te vra.
2 Mei 2012
