Suid-Afrika kan binnekort ‘n ooreenkoms met die Republiek van die Kongo bereik oor grond vir Suid-Afrikaanse boere, sê Agri SA.
Luidens ‘n berig op Reuters sal dié ooreenkoms na verwagting voor die einde van die maand aangegaan word, met sommige boere wat die land vroeg in 2011 sal besoek om grond te identifiseer.
“Ons het pas die finale sake rakende individuele kontrakte tussen boere en die Republiek van die Kongo se landboudepartement twee weke gelede afgehandel,” sê dr. Theo de Jager, ondervoorsitter van Agri SA.
Grootste in sy soort
Volgens die berig sal die ooreenkoms een van die grootstes op die kontinent wees. Dit sal fokus op verbeterde voedselsekuriteit in die Kongo, deur Suid-Afrikaanse boere toe te laat om grond vir tot 105 jaar te huur om mielies, soyabone, pluimvee en suiwel te produseer.
De Jager sê Suid-Afrika sal ook verdere boerderygeleenthede in die Gaza-provinsie van Mosambiek ondersoek. Sowat 800 Suid-Afrikaanse kommersiële boere het reeds boerdery bedrywighede in dié land.
Grondhervorming
Een van die groot faktore wat ontwikkeling in die plaaslike landboubedryf pootjie is grondhervorming en die onsekerheid oor hoeveel grond oorgedra is, en moontlike veranderinge aan beleide om die proses van oordrag te versnel.
Volgens die berig het die Departement van Grondhervorming en Landelike Ontwikkeling verlede jaar gesê dat 6% van grond aan begunstigdes oorgedra is. De Jager sê dié syfer gee egter nie die werklike prentjie weer nie, aangesien meer grond deur private transaksies oorgedra is. “Baie grond behoort ook aan trusts en firmas en ons moet na hulle vergoeding kyk en wie hulle aandeelhouers is”.
Bron: Reuters
15 November 2010
