Ná jare se beplanning en maande se wag het die Square Kilometre Array of SKA-organisasie aangekondig dat Suid-Afrika en Australië dié teleskoop sal deel.
Luidens ’n berig op Business Day se webwerf beteken dié besluit nie noodwendig dat die teleskoop in die helfte tussen die twee lande verdeel sal word nie.
Die teleskoop sal na raming uit 3 000 antennas bestaan en sowat R23 miljard kos. Suid-Afrika se bod het samewerking met agt ander Afrika-lande – Mosambiek, Zambië, Mauritius, Madagaskar, Ghana, Kenia, Botswana en Namibië – ingesluit. Die hoofaanleg vir die teleskoop sal by Carnarvon in die Noord-Kaap wees.
Nog besonderhede oor hoe die stelsel gaan werk, sal binnekort bekend gemaak word. Noudat die aankondiging gemaak is, kan konstruksie aan die teleskoop begin. Dit behoort teen 2024 voltooi te wees.
Landbou
Intussen is die landboubedryf dankbaar dat die land gasheer vir ’n deel van die teleskoop gaan wees.
Mnr. Johannes Möller, voorsitter vir Agri SA, sê hulle het jare gelede al met die SKA-organisasie en ander belanghebbendes oor dié teleskoop begin vergader. “Aanvanklik is gepraat van ’n belegging van sowat R5 miljard vir die land en die provinsie.”
Möller sê die teleskoop gaan nie net tot die land se tegnologiese voordeel wees nie, maar boere sal regstreeks voordeel daaruit kan trek. “Die teleskoop sal maklik toeganklik moet wees, wat beteken paaie sal opgeknap en onderhou moet word. Verder kan sal dit ook die satellietnetwerk, veral in die Carnarvon-omgewing, versterk.”
Hy sê kommer bestaan wel oor die invloed wat die teleskoop aanvanklik op satelliet- en selfoonseine kan hê, maar as die stelsel voltooi is, sal kommunikasie baie beter wees.
Bron: Business Day
25 Mei 2012
