Die nuwe voorlopige teenstortingstariewe op ingevoerde hoendervleis kan op kort termyn druk in die aanbodkant van die mark meebring, maar plaaslike produsente sal op langer termyn genoeg kan voorsien.
Só sê mnr. Izaak Breitenbach, hoofbestuurder van die braaihoenderorganisasie van die Suid-Afrikaanse Pluimveevereniging (SAPV), oor die tariewe van 67% tot 265% wat middel Desember in werking getree het. Die kommissie vir internasionale handelsadministrasie moet binne ses maande oor finale tariewe besluit.
Die tariewe geld vir stukke aan die been van sekere produsente in Brasilië, Spanje, Denemarke, Ierland en Pole, asook borsvleis uit Brasilië.
