Agri-Expo het vanjaar ’n suksesvolle en innoverende SA Kaasfees aangebied nadat dit weens die covid-19-pandemie twee jaar nie aangebied kon word nie. Die organisasie bied sedert 2002 die geleentheid aan. Al die kaartjies was uitverkoop, sê mnr. Johan Ehlers, uitvoerende hoof van Agri-Expo, luidens ’n verklaring.
Die fees is van 30 April tot 2 Mei op Sandringham buite Stellenbosch aangebied. Weens covid-19-regulasies moes besoekers tot 2 000 per dag beperk word. ’n Opwipfees is die naweek van 23 en 24 April by die Groote Post-wynlandgoed buite Darling aangebied. Dit is deur sowat 3 000 feesgangers bygewoon.
Mnr. Alan Winde, premier van die Wes-Kaap, sê die gewildheid van die fees ’n teken van ekonomiese groei. Dit dien as toonvenster van landbouprodukte en bring mense byeen.
Buffel-mozzarella en halloumi vlieg van die rakke
Kaasliefhebbers kon kies en keur uit produkte van 120 uitstallers, onder meer klein kaasmakers wat hul produkte bekend kon stel deel as deel van die #SupportSmallCheeseMakers-projek, in vennootskap met die Wes-Kaapse departement van landbou.
Produkte het van die rakke gevlieg, soos Zandam se buffel-mozzarella, Jabulani Chigara se draakvrugte, Klein River Cheese se wêreldbekroonde, verouderde gruberg, Rockvale én Foxenburg se bokmelkkase, Tlaquepaque se halloumi, Karootjie van Calitzdorp se roosmaryn-en-rooiwynkruiesout en die Wes-Kaapse Heuningbostee-koöperasie se tee.
Vanjaar se sukses kan tot ’n groot mate toegeskryf word aan die platform wat geskep is vir van klein entrepreneurs tot nasionale maatskappye om nuwe produkte aan verbruikers bekend te stel, sê Ehlers.
Die SA Kaasfees vind volgende jaar weer oor die langnaweek van Saterdag 29 April tot Maandag 1 Mei 2023 plaas. Besoek www.cheesefestival.co.za vir nog inligting, volg die SA Kaasfees op Twitter @SACheeseFest, Facebook @SACheeseFestival of Instagram @sacheesefest, of kontak Agri-Expo by admin@agriexpo.co.zat of tel. 021 975 4440.
