Kaas- en wynliefhebbers kan tydens vanjaar se SA Kaasfees uitsien na ’n splinternuwe ervaring – ’n ontdekkingsreis van kaas en meer in die vorm van twee opwip-pieknieks.
Die pieknieks vind oor twee naweke in April by twee gewilde bestemmings plaas – van die Weskus tot die Wynland.
’n Verskeidenheid uitstallers sal by elke opwip-piekniek alles bied vir ’n uithalerpiekniek – van piekniekmandjies tot plaaslike, internasionale en boetiekkase, uitgesoekte wyn, bier en jenewer, asook besonderse plaaslike produkte. Besoekers kan ook uitsien na gratis vermaakprogramme met top-Suid-Afrikaanse kunstenaars, interaktiewe proe-ervarings met bekende sjefs en opwindende aktiwiteite.
Die eerste piekniek sal ná Paasnaweek op Saterdag 23 April en Sondag 24 April by Groote Post buite Darling plaasvind, en die tweede piekniek sal van Saterdag 30 April en tot Maandag 2 Mei by Sandringham buite Stellenbosch aangebied word.
Kaartjies kos R290 per persoon per dag. Besoektye is van 10:00 tot 18:00. Kaartjies is beskikbaar by Webtickets (bit.ly/sacheesefest-popuppicnics) en in Pick n Pay-winkels. Geen kaartjies sal by die hekke verkoop word nie. Slegs ’n beperkte hoeveelheid kaartjies is by elke bestemming beskikbaar en streng covid-19-protokolle sal geld.
Besoek www.cheesepicnics.co.za, Twitter @SACheeseFest, Facebook @SACheeseFestival of Instagram @sacheesefest, of kontak Agri-Expo by tel. 021 975 4440 of admin@agriexpo.co.za vir nog inligting.
