Die bemarkingseisoen van 2016/’17 (1 Mei 2016 tot 30 April 2017) dui op die mielie-oes wat aan die einde van 2015 en die begin van 2016 geplant is. Die ernstige droogte tydens planttyd en die gepaardgaande afname in aanplantings is nou al ou nuus.
Die invoer van geel, sowel as wit mielies wat hierdeur genoodsaak is, verloop tot dusver goed en geel mielies word vanaf Mei 2016 teen ‘n gemiddelde tempo van meer as 180 000 ton per maand ingevoer. Die plaaslike verbruik van geel mielies (spesifiek dierevoer) is sowat 5% minder as die vorige bemarkingseisoen. Ander aanwendings en uitvoer na buurstate bly konstant.
Oordragvoorrade van geel mielies aan die einde van April 2017 behoort voldoende te wees.
Neiging in verbruik
Die neiging in die menslike verbruik van wit mielies dui op ‘n afname van 10% in vergelyking met die vorige jaar. Dit is eintlik verbasend as die witmielie-prysstyging van 50% in drie maande gedurende hierdie tyd in ag geneem word.
Wit mielies word teen meer as 70 000 ton per maand ingevoer. Dit is onduidelik of hierdie tempo vir die res van die bemarkingseisoen volgehou gaan word. Ingevoerde wit mielies is nie net ongewild nie, maar pryse word oor tyd ook al hoe laer. Op 25 November 2016 was die sluitingpryse van Desember 2016, Maart 2017 en Mei 2017 WMAZ onderskeidelik R4100, R3955 en R2800 per ton. Indien witmielie-invoere te vroeg gaan opdroog, sal die oordragvoorraad van wit mielies in April 2017 baie knap wees en kopers kan skarrel om genoeg wit mielies in die hande te kry.
Die 2017/’18-bemarkingseisoen
Dit is mielies wat nou geplant of in die proses van aanplanting is. Reënval is verreweg die belangrikste maatstaf van ‘n goeie of slegte mielie-oes. Voorspellings dui op effens bogemiddelde reënval vir die plant- en groeiseisoen. Aanplantings in die oostelike gedeeltes van die mieliegebied het volgens plan verloop (hoewel dit nou droog is) en die plantproses vir die westelike gedeelte lyk goed op dreef.
Berekeninge in hierdie stadium dui daarop dat Suid-Afrika se witmielie-oes meer as binnelandse (menslike) behoeftes en uitvoer na buurstate sal wees. Boere se voorneme om te plant en ‘n gemiddelde opbrengs word as maatstaf vir dié berekeninge gebruik.
Dit is egter ‘n ander saak in die geval van geel mielies. Die verwagte oes gaan heelwat kleiner as plaaslike- en buurstaat verbruik wees (voornemens om te plant en ‘n gemiddelde oes word weer gebruik). Indien die huidige verwagtinge van ‘n normale mielie-opbrengs (wit en geel) realiseer, sal die surplus wit mielies genoeg wees om ook in die verwagte geelmielie-tekort te voorsien, met ‘n bietjie diepsee-uitvoer.
Hoewel die komende oes nog ver van in die silo’s is, lyk dit asof mielies vir hierdie (komende) seisoen in Suid-Afrika se hawens op skepe gelaai gaan word, eerder as om dit af te laai.
* Johan Strauss is 'n navorser by BVG Commodities.
