Die Brahmanbul R10 12/314 Sir Christoff is op die Labuschagnes se jaarlikse produksieveiling op Bela-Bela aan mnr. Paul Duarté van Pretoria verkoop. Die prys oortref die vorige rekordprys van R575 000 wat vir die bul HOT 08/732 Mr Moremi van mnr. Linde du Plessis van Fouriesburg betaal is.
Die veiling is deur baie hoë pryse gekenmerk. Dít teen die einde van ‘n jaar waarin Suider-Afrika deur ‘n uitmergelende droogte gekarnuffel is.
Die hoogste prys vir ‘n vroulik dier was R100 000 vir R10 15/93 Lady Gina De Manso, wat deur mnr. Christiaan Botha van Swartwater betaal is.
Altesame 13 wit bulle is teen gemiddeld R142 461 stuk verkoop en 20 wit vroulik diere teen gemiddeld R59 850 stuk. Vyf rooi bulle het gemiddeld R48 000 stuk behaal en vyf vroulike rooi diere gemiddeld R37 000 stuk. Die gemiddelde prys van al 43 Brahmane wat verkoop is, was R82 182 (semen uitgesluit).
Mnr. Willem Barnard, voorsitter van die Brahmantelersgenootskap se promosiekomitee, sê die veiling was ‘n hoogtepunt in die Brahmanbedryf. Altesame 425 mense het die veiling bygewoon en 80 kopers het geregistreer.
Die veiling is deur André Kock en Seun Limpopo aangebied.
